كود كازا ///
هاد الصباح غادي يكون عزيز اخنوش رئيس التجمع الوطني للاحرار قد قدم ترشيحو لعمودية مدينة اكادير. بعد ما دار جولة اولى من المفاوضات لتشكيل الحكومة مع احزاب البام والاستقلال والاتحاد الاشتراكي والحركة الشعبية والاتحاد الدستوري٬ وقبل ما يكمل باقي الاحزاب٬ مشى اليوم لاكادير باش يحط ترشيحو. حقاش غدا هو اخر اجل لوضع ترشيحات لرئاسة الجماعات والجهات.
وفعلاقة بالموضوع علمت “كود” ان اخنوش تكلف شخصيا بالتوقيع على من تزكيات الحزب للترشح لمنصب رؤساء المجالس البلدية لكبيرة والجهات. هاد الشي دارو بعد ما بدات المشاكل فبعض المدن.
فقد وقع شخصيا على ترشيح نبيلة الرميلي باش تقدم ترشيحها لمنصب عمدة الدار البيضاء بحالها بحال اسماء اغلالو اللي غادية تاخد عمودية الرباط.
فكازا ناضت اسماء متورطة ففضايح بحال بنعمر كتنوعر باش تاخد التزكية للترشح لمجلس ادارة الدار البيضاء بحالو بحال عدد منو وبدات حروب خايبة ضد الرميلي.
اخنوش كان فالحملة ديالو هدر على تجديد النخب ويجيب اسماء جديدة للمسؤولية ولكن هادوك لقدام باغيين يبقاو فيها خالدين.
