طنجة/ كود:
مسؤول عن المياه والغابات بإقليم فحص أنجرة بطنجة، وهو عبارة عن مجموعة من الدواوير، وقّفْ مؤخرا واحد السيد كان عندو بنادق قنص ورخصة ديالو، ودخل معاه فمساومات ما عندها حتى علاقة بالقانون.
المشكلة أن هاد المسؤول عن المياه والغابات عندو علاقة قوية مع مسؤول بشركة سياحية خاصة، واللّي حتى هي ولات كتعطي رخص القنص للناس اللي كيخلصو ليها ثمن الاشتراك السنوي.
لكن القضية الحامضة هي أن مسؤول المياه والغابات في فحص أنجرة وصاحب بنادق القنص كانو معروضين بجوج لواحد الحفلة فدار صاحب شركة السياحة، يعني مسؤول المياه والغابات كان عارف صاحب بنادق الصيد غادي يدوز من طريق معينة، لذلك تلاقاه ودخل معاه فمساومات.. يعني كمين بجميع المقاييس… !
القضية هي انه شكون قال لمسؤول المياه والغابات أن فلان دايز من هاد الطريق، بينما الوحيد اللي كان عارف هو صاحب الشركة السياحية اللي كيحاول يستدرج جميع القناصة فالمنطقة يجيو عندو شركتو عوض ما يبقاو فجمعية أخرى.
المهم.. تم وضع شكاية بمسؤول المياه والغابات.. في الوقت اللي بداو سكان فحص أنجرة كينظمو نفوسهم باش يحتجو على استفحال القنص العشوائي فالمنطقة.. وتيقولو بلّي القناصة المبتدئين ما كيفرقوش بين الحجل والحلوف وبين بنادم.. والله يحضر السلامة.
المهم.. القضية حامضة.. وغادا تزيد تحماض.. !
