محمد سقراط-كود///
بزاف ديال المغاربة كيهضرو على أساس أنه كاين معايير محددة خاص توفر عليهم الأنثى باش تقدر تتعرض للإغتصاب، وكاين حد أذنى من الجمال والفورمة الى هبطات عليهم شي وحدة داك الساعة يمكن ليها تمشي عريانة سفاحية وسط الشارع وماغادي يديها فيها حتى شي مغتصب مغربي لي بالضرورة ذواق، أو حسب مافهمت من هدرتهم فراه داخل كل مغربي مغتصب ينتظر أن تلاقيه الوجبة بضحية فيها الشروط المطلوبة، لذا فالذكر المغربي ( حسب ما قصد هؤلاء) هو مغتصب عنندو شروط تعجيزية نوعا ما، خاصو حتى يتلاقا مونيكا بيلوتشي دايزة تحت شي قنطرة بالليل عاد يقدر يغتاصبها( وماشي بالضرورة يصورهم كاسبر نوي)، أما هادوك العيالات والبنات لي ظهرو فداك الفيديو فأغلب المغتصبين المغاربة يتعففون عن حتى النظر اليهم، وحتى الرجال المغاربة العاديين( لي باقي ماتشدوش بالإغتصاب ولكن حسب هدرتهم عاد ناويين) قالو بلي أن آخر وحدات يمكن يكونوا على لائحة المرشحات بالإغتصاب هوما العيالات لي بانوا في الفيديو.
الى بنادم بغا يسمع للمنطق وبلا مزايدات ديال بنادم ناقص حنان، فراه دويرة بسيطة غير فالأخبار المنشورة حول الإغتصاب في المغرب غادي يبانليك أن العيالات المغتصبات راه من جميع الانواع والأشكال وفي كاع الفئات العمرية، والقاسم المشترك بيناتهم ماشي هو الجمال المشجع على الإغتصاب، وإنما الحزقة وقلة شي والهشاشة لي كتحطهم في مواقف كيكونوا فيها عرضة للإغتصاب، هذا مكيعنيش ان العيالات لي لاباس عليهم مكيتعرضوش للإغتصاب بدورهم ولكن ماشي بنفس الأرقام وبنفس الظروف وفي الغالب كيكون شي واحد من الأقارب والمعارف، حيت مكيكونوش ساكنات بوحدهم فشي خربة فالعروبية لا والي لا حنين وفين مايعركها ماحيا شي واحد فالدوار يجي ينقز عليهم الحيط، ومكيخرجوش مع النبوري ويدوزو وسط أخطر الأحياء باش يالله يوصلو للبلاكة ديال الطوبيس لي غادي توصلهم للخدمة، هوما لي كيتكرفصو عليهم المشغلين ديالهم، ويستاغلوهم أقاربهم، وشلا كوارث كلنا عارفينها وكلنا عارفين ظروف المرة في المغرب وشنو المعاناة اليومية لي معرضة ليها غير هو كل مازادت الفلوس كل ما نقصات المعاناة ولكن حتى بالفلوس راها كاينة.
على خلاف ماقالو المغتصبين الإفتراضين ديال فايسبوك فراه ماشي الزين ولاطاي هوما لي كيخليو مرأة عرضة للإغتصاب أكثر من أخرى بل الحزقة والخيوبية وقلة شي والهشاشة والضعف، وهادوك العيالات لي دارو داك الفيديو لي خلق هاد الجدل كامل وعرفنا ببزاف ديال المغتصبين الإفتراضيين الذواقة راهم بطلات حيت قدرو يبادرو ويديرو فعل واخا مايعجبناش شكلو أو محتواه إلا أنه على الأقل حركة وفعل في ظل هاد السكون والجمود والتكماش لي مكمش بنادم وصاقل، المرأة كتعاني في المغرب وعندها الحق توصل وتعبر على هاد المعاناة بأي طريقة بغات وقدرات عليها المهم هو صوتها يوصل هذا هو المهم.
