عفراء علوي محمدي- كود//

المغني سعد المجرد، اللي عندو فالرصيد ديالو اتهامات كثيرة ديال اغتصاب بنات مختلفات، هاوا دابا خرج يندد باغتصاب وقتل الطفل عدنان ويدير فيها سفير النوايا الحسنة.

فواحد السطاتي كتقتل بالضحك، المجرد قال فيها بأن “الإعدام قليل فحق المجرم”، ولكن مافراسوش أنه غير مؤهل لقول هذ الهضرة ويدير فيها عادل ومفتي، ويبين أنه تألم لحال الطفل اللي مشا ضحية بيدوفيلي مارحمش براءتو، لأنه حتى هو مارحمش نساء كانو فالقبضة ديالو، وكون ما الألطاف سماوية لوقعات ليهم كارثة أكبر مانعرفوش باش تسالي.

ومانساوش أن المجرد باقي متابع بدعوى اغتصاب رفعاتها ضدو فتاة فرنسية، فغرفة فأوطيل فباريس ووجه إليه القضاء تهمة “الاغتصاب مع ظروف مشددة للعقوبة” ودخل الحبس حتى تعاود تطلق من جديد ف2017، وهي القضية اللي مازال ما حسمات فيها المحكمة للآن.

وف2017، شابة فرنسية من أصول مغربية عندها 20 عام دعات المجرد، وأكدات “أنه اعتدى عليها جنسيا وضربها فكازا ف2015″، ومن بعد قررات الشابة تنسحب من الدعوى والقضاء بقى متبع الملف.

وبنت خر تابعات المجرد سنة 2018 وحطات شكاية ضدو على خلفية حادثة مفترضة وقعات فمدينة سان تروبي ففرانسا.

وقبل هذشي كَاع، كان القضاء الأميركي وجه للمجرد تهمة الاغتصاب في واقعة كتعود لعام 2010، لكن الدعوى تسقطات من بعد، لكن باقي أصابع الاتهام موجهة ليه بسبب هذ القضية.