نجوى المالحي-كود//
نهار على نهار كيزيد الفَلوكَر المغربي طه السولامي “ايسو” كيفرض راسو في اليوتوب المغربي بالفيديوهات لي كينشر في القناة ديالو.
هاد اليوماين وفي اطار التحدي ديال 25/25 لي بداه بمناسبة عيد ميلادو الـ25، اختار طه يصور فيديو مع “بشرى” لي هي سيدة متشردة كتعيش في الزنقة، وهي نفس السيدة لي ديما كتبان معاه في الستوريز هو وخوه علي.
بشرى كشفات في الفيديو لي وصل لـ2 مليون مشاهدة في يوماين، أنها قرات في “ليسي ليوطي” وكبرات في معاريف وكانت ساكنة في الفيلات لكن حياتها تقلبات ملي ماتو الوالدين ديالها والورث ديالها طاح في يدين ناس خداوه ليها وبقات هي في الزنقة.
بشرى لي كتكلم بالفرنسية بطلاقة كشفات انها تعرضات للاغتصاب وحملات، وبنتها دابا في الخيرية مكتعرفهاش.
الفيديو، قسم المغاربة، بحيث البعض جاه زوين وفيه ميساج، اننا منحكموش على الناس من المظاهر وخاصنا نسمعو لقصصهم، وقالو ان طه اختار يبين هاد السيدة في قناتو باش الناس تعاونها وماتبقاش عايشة في الزنقة.. والبعض الاخر شاف فيه استغلال ديال مآسي الناس لغرض الشهرة والبوز واللايك والمتتبعين في مواقع التواصل.