وكانو جوج لجان طبية مستقلة تابعين للهيئة المنظمة لبطولة أستراليا المفتوحة للتنس، عطاو “شهادة الإعفاء” لدجوكوفيتش.
ولكن السلطات الأسترالية من بعد منعات صاحب الرتبة اللولة عالميا من دخول البلاد باش يشارك فبطولة أستراليا المفتوحة للتنس (اللي ربحها 9 دالمرات)، مباشرة بعدما وصل لمدينة ملبورن السيمانة الفايتة.
ونهار الإثنين اللي فات رفع دجوكوفيتش دعوى قضائية، فالوقت اللي هو مزال حاصل فمركز خاص باحتجاز المهاجرين وسط مطار ملبورن.
وتسببات هاد القضية فصداع كبير لا فأستراليا ولا فجميع أنحاء العالم. شي مع وشي ضد، ولو أن الغالبية بان ليهم بللي اللعاب الصربي كيقلب على تعامل استثنائي معاه من دون كَاع الناس.
وأكثر من هادشي وصلات القضية لأزمة دبلوماسية بين صربيا و أستراليا، فاش اتاهم الرئيس الصربي، ألكسندر فوتشيتش، الأستراليين بللي “تعاملو خايب بزاف مع البطل”.
وقال المحامون أن نوفاك دجوكوفيتش (34 عام)، اللي كيعارض التلقيح ضد كورونا، خذا “إعفاء طبي” بلا ما يايديرش الفاكسان ويقدر فنفس الوقت يشارك فبطولة أستراليا المفتوحة، وهادشي كعا بزاف دالناس خصوصا منهم المواطنين الأستراليين اللي مفروضة عليهم شروط وقيود وقائية صارمة لمواجهة انتشار الوباء مع ظهور المتحور الجديد “أوميكرون”.
والتطور اللي وقع هو منين منعات السلطات الأسترالية، نهار الأربعاء، لاعب التنس الصربي من دخول البلاد بعدما وصل للمطار، وخا كانت عندو ڤيزا.
وقالو مسؤولين من بوليس الحدود فأستراليا بللي دجوكوفيتش “ماقنعهومش وماجابش حتى دليل مناسب”، و الإصابة السابقة بفيروس كورونا ماشي مبرر طبي يسمح ليه يدخل البلاد بلا تلقيح. بحالو بحال كَاع المسافرين.
فهاد الظروف المورال ديال اللعاب طايح وغالبا ما يقدرش يلعب من بعد وخا يكون الحكم النهائي فهاد لافير لصالحو ويخليوه يدخل. غادي يكون صعيب عليه يلعب هاد البطولة طرونكيل من بعد هاد “الفيلم” كلو اللي وقع، كيف قالو بعض المتتبعين ديالو فمواقع التواصل الاجتماعي.
لكن فالمقابل وفآخر الأخبار اللي نقلاتها وسائل إعلام دولية، هاد العشية، فإن نجم التنس الصربي طلب نقله من مركز احتجازه في مطار ملبورن لمكان آخر باش يقدر يتريني و يوجد قبل انطلاق بطولة أستراليا المفتوحة، حسب المحامين ديالو.
ودبا كلشي كايتسنا قرار المحكمة اللي غادي تحسم فقرار الترحيل فجلستها اللخرة نهار الإثنين الجاي.