عفراء علوي محمدي- كود//

عرفات “كود” من مصادر مطلعة أن صحاب الدياليز والناس اللي عنهم قصور كلوي حاد أو طفيف كيعانيو الأمرين فهذ المرحلة اللي كتعرف انتشار عدوى فيروس كورونا المستجد فمجموعة من الأقاليم.

فمن جهة السبيطارات مبلانيين والأسرة عمران والخدمات الصحية نقصات لا لصحاب الدياليز ولا لغيرهم بسبب تزايد عدد حالات “كوفيد 19″، ومن جهة ثانية كيصعاب على هذ الفئة يولجو الخدمات الصحية، وخصوصا منهم اللي باينة عليهم اعراض شبيهة بأعراض فيروس كورونا، بحكم أن مجموعة من المراكز كترفض استقبالهم إلى كانت كتبان فيهم أعراض الفيروس.

والناس اللي كتبان فيهم أعراض الفيروس عامة كيصعاب عليهم يديرو التحاليل، بحيث كتقول المصادر أنه واخا عدد التحاليل ارتفع، إلا أن بعض الفئات اللي مكتكونش خالطات مرضى “كوفيد 19″ بشكل مباشر كيصعاب عليها تدوز التيست، وخا تكون فيها الكحة او السخانة.

معاذ المرابط، منسق المركز الوطني لعمليات الطوارئ الصحية فوزارة الصحة، نفى هذشي، وقال بللي الوزارة بالعكس، كتدير جهدها باش تدير الكشوفات على هذ الحالات، بحكم أن صحاب القصور الكلوي عندهم أولوية لا هوما لا غيرهم من الناس اللي مصابين بأمراض مزمنة أو اللي عندهم مناعة ضعيفة.

وزاد، فتصريحو ل”كود”، أن الناس اللي كيعانيو الفشكل الكلوي إلى كانو مراض ب”كوفيد 19” كيستفدو بانتظام من حصص تصفية الدم، وكاين فيهم اللي كيتم الإيواء ديالو فمراكز القصور الكلوي، لكن كيتم عزلو على البقية.

وقال : “ضروري تكون تصفية الدم، وعامة ضروري يستافدو المصابين بالأمراض المزمنة من علاجات لهذ الأمراض، بالإضافة للبروتوكول العلاجي اللي معتمداه الوزارة ضد الفيروس”.