محمد سقراط-كود///
كاين واحد النوع ديال الذكور المغاربة عندهم واحد الإحساس بالإظطهاد بالإظافة الى العدوانية إتجاه المرأة غير مبررة وغير مفهومة، خصوصا في بلاد محافظة بحال المغرب الراجل باقي يمكن ليه يتزوج ربعة دالعيالات بالقانون، ويمكن ليه ينعس مع وحدة وتحمل وتدير إختبار ديال الحمض النووي لإثبات النسب وماتصور والو حيت الولد للفراش وللعاهر الحجر، ويمكن ليه في الأعراف زوالتقاليد يغتاصب وحدة ويتزوجها وهانية ويتصالحو العائلات، ويمكن ليه في حالة كان جايب راسو وباغي يشوف وحدة غادا لليسي ويسيفط مو تخطبها ويزوجوها ليه هانية واش كتبغيه أو كتعرفوا وإرادتها وشنو باغا تدير في حياتها هادشي غير مهم وغير توافه الأمور، مادام فيه مواصفات الزوج الصالح وجا بالطريقة الكلاسيكية المحببة للأباء والأمهات، فراه مكاين فيه مايتفرض وكتلقى واليديها كيبززوه عليها بحال الى هوما لي غادين يحلو ليه رجليهم في تالي الليل وأول الصباح ومع نص النهار.