كود ياوندي ///
قال نجم السينغال سابقا حاجي ضيوف فحوار مع “كود” بياوندي باللي سمع بتصريحات الكاميروني روجي ميلا، احد اساطير كرة القدم الافريقي اللي قال فيها خاص المغرب ومصر يلعبو مع الاوربيين.
ضيوف دعا فتصريحو لـ”كود” الى “تكثل مقدس” حول افريقيا والى انجاح هاد الدورة بالكاميرون.
واكد ضيوف: “كنقولها ونعاودها. المغرب دار بزاف لافريقيا”، ثم اضاف “كنعرفو اش دار ملك المغرب صاحب الجلالة للقارة الافريقية”.
ضيوف قال فحوار مع “كود” “كمهتم بالشأن السياسي وكنتبع اش وقع فقارتي، راه اللي دارو الملك محمد السادس بزاف لهاد القارة”، ثم اكد ان الملك محمد السادس والرئيس الكاميروني بول بيا عندهم نفس الهم الافريقي.
وذكر ضيوف فتصريح لـ “كود” باللي روجي ميلا نجم كبير وابن هاد القارة واوضح ان دورو كلاعب هو يجمع كلشي واللي يخرج رابح هو القارة الافريقية.
ودعا عبر “كود” كلا من روجي ميلا وفوزي لقجع، رئيس الجامعة الملكية المغربية لكرة القدم، حقاش بجوجهم اذكياء، يتلاقاو ويهدرو على مستقبل القارة.