الجيش الجزائري دار مجزرة فحق شباب من مخيمات تندوف كانوا كينقبوا على الذهب
عفراء علوي محمدي- كود//
عبر محمد بيوض، المدير الفني للمهرجان الدولي لسينما التحريك بمكناس، على الإشادة ديالو بإنتاج القناة الثانية “دوزيم” لأول مسلسل للرسوم المتحركة بتقنية 3D، مغربي 100 فالمية وبالدارجة المغربية.
وكشف بيوض، فتصريحو ل”كود”، أن هذ المسلسل ماشي الوحيد، بحيث كل من القناة الثانية والشركة الوطنية للإذاعة والتلفزة، كانو علنو، فالصيف اللي فات، على طلبات عروض لإنتاج أعمال من هذ القبيل، وهذ العمل داخل فهذ المشاريع.
وبصح، كان سبق للقناة الثانية طلبات 3 برامج ديال رسوم متحركة بتقنية 3D، و”لاسينيرتي” طلبات 4 بتقنية 3D و2D، هذ الأخيرة طلبات برامج كتكلم على قيم المواطنة وتاريخ المغرب، بينما 2m كانت بغات برامج كتستهدف الأطفال والعائلات، بتيمة الخيال، ويكون فيها طابع مغربي.
بالنسبة لبيوض، هذ المشاريع “تاريخية”، وما يمكن الإنسان غير يصفق ليها: “كنقول برافو للقنوات ديالنا على هذ المبادرة الممتازة، لأننا محتاجين للمنتوج المغربي فهذ المجال، بلمسة مغربية كتعكس هويتنا، حيت مايمكنش ديما نستهلكو منتوجات دول أخرى بحال اليابان أو غيرها، من حق المغرب يدير آنيماسيون خاصة بيه”.
وفإعلانها، عطات “لاسينيرتي” 7 مليون ونص فكل حلقة، بمجموع 250 مليون سنتيم، بينما “دوزيم” دايرة 10 مليون لكل حلقة، بمجموع 200 مليون سنتيم، وهذا هي ميزانية المسلسل الجديد اللي قريب تبثو القناة الثانية، فنظر بيضو، هذ الفلوس قلالين بزاف.
“مايمكنش نقولو ماكافيينش ونبخسو من هذ العرض، لا بالعكس، خاصنا نشكرو قنواتنا على هذ الخطوة اللي ممكن من موراها الامور تتحسن ويتعطى كثر لهذ الأعمال، غير أنا كنتيق كَاع الستوديوهات اللي شتغلات على هذ الإنتاجات، وقالت ان الفلوس اللي تعطات ليها قليلة، وانهم اضطرو يحيدو أحداث كثيرة وشخصيات وغيرها باش يقادو الحساب، بصراحة هذو اللي خدمو على هذشي ماكنعرفهمش، لكن كنقول كلمة حق”، كيقول بيوض.
واعتبر مدير “فيكام” أن الناس اللي انتقدو هذ الفلوس اللي تعطات فهذ العمل عبر مواقع التواصل الاجتماعي، ماعارفينش، ودايرين إسقاط لمسلسل عادي على مسلسل رسوم متحركة، “التحريك كيتطلب جهد كبير، حيت دقيقة وحدة ففيلم التحريك مكلفة، وكيشتغل فيها فريق على قدو، فما بالك إلى كان مسلسل على حلقات… هذ الناس مافاهمينش، وأنا ولد المجال واشتغلو ناس حدايا فالمهرجان وعارف صعوبة إنتاج هذ الأعمال”، على حساب هضرتو.
من جهة خرى، أكد بيوض أن هذ الأعمال غادي توفر مناصب شغل كثيرة، وتجذب فنانين باش يجيو للمغرب لستثمرو فمجال التحريك، كيف غيوليو عندنا معاهد وشعب خاصة بهذشي.
وقريبا، غتبث قناة دوزيم أول رسوم متحركة بالدارجة المغربية، وبصيغة 3D، وهو الإنتاج الأول من نوعو فالمغرب، ومن المقرر يتم إنتاجها ف2022، بميزانية 200 مليون سنتيم.
هذ السلسلة، المغربية 100 فالمية، كتكون من 20 حلقة، المدة ديالها بين 3 دقايق حتى ل5 دقايق، وغيتم إنجازها فاستديوهات “لوريم” و”آرتكوستيك” و”نيفرسين”.