كود الرباط//

علمت “كود” من مصدر مطلع أن شركة الخطوط الملكية للطيران، غاذي تبيع او تكري 20 طيارة تابعة للأسطول ديالها اللي فيه شي 66 طيارة =فيها طيارات جداد يالله دخلو=، وغادي تصيفط 160 بيلوط للتقاعد من اصل 600 تقريبا عندنا، بسبب تداعيات أزمة كورونا على قطاعي الطيران والسياحة. طبعا اللي غادي يمشيو فحالهم فاطار اتفاق فيها اما المغادرة الطوعية او التقاعد بالاضافة الى 160 بيلوط كاين شي 700 موظف. المجموع كاين 858.

مصادر “كود” قالت بأن لارام لي تضررت بزاف من كورونا، ولي وصلات خسائرها بالملايير بسبب توقف اغلاق الحدود بين الدول والفنادق وتوقف الرحلات الجوية الداخلية، تستعد لإجراء أكبر تغيير في مسارها. مديرها اللي ما فيدوش عدو كان قال باللي خسائر الشركة يوميا كتوصل ل50 مليون درهم وبالي الشركة خاصها 3 سنين باش تعافى

بعض الخطوط غادي تلغا مرحليا، حتى يتعفا قطاع الطيران.

مبررات لارام هي تخفيظ مصاريف وتكلفة الاسطول لي عندها، وشي دول مافيهاش حركية السفر مهمة ولي يالله تحلات.
دبا كولشي غاذي يبان مستقبلا.

اليوم فالمجلس الوزاري كان قرار اخر كيهم لارام من غير الحديث عن دعم المؤسسات العمومية. هاد القرار هو مشروع “تعديل القانون المتعلق بجيش الرديف في القوات المسلحة الملكية، ويهدف إلى إدماج في سلك ضباط الاحتياط، أطر المؤسسات والمقاولات التي خضعت للتدريب والتكوين في المنشآت التابعة للقوات المسلحة الملكية”.

هاد مشروع المرسوم يسمح “بإعادة تنظيم المدرسة الملكية الجوية، ويهدف إلى تمكين شركات النقل الجوي الوطنية من الاستفادة من خبرة القوات الجوية الملكية في مجال الطيران، من خلال تمكين المدارس الجوية الملكية من تكوين طياري الخطوط الجوية لشركات الطيران الوطنية، وذلك في إطار تعاقدي بين إدارة الدفاع الوطني وشركات النقل الجوي الوطنية” كيف قال بيان عقب المجلس الوزاري.