كود هناء ابو علي ///

بغيت نتسنى حتى يتعرض الفيلم الوثائقي من 4 حلقات “انا بيضاوي” حتى دوز الحلقة الاولى الحد الجاي فالليل على “دوزيم”٬ لكن باش تشوف حوارات وتصريحات على معطيات جات فالحلقة الثالثة اللي تعرضات ول البارح ف”لافان بروميير” بحديقة الجامعة العربية بكازا كتستفز.

نحطوكم فالسياق. فالحلقة الثالثة اللي مدتها بحال باقي الحلقات 52 دقيقة هدر هاد الوثائقي اللي كتبات سيناريو ديالو غيثة القصار ودار ليه الاخراج نور الدين لخماري ونتجو نبيل عيوش وشركتو “عليان للانتاج” لصالح “دوزيم”٬ توصفات المقاومة ضد الاستعمار الفرنسي اللي داروها المقاومين ف”كاريان سانترال” =الحي المحمدي اليوم= ب”اعمال الشغب”.

باينة اعمال شغب عند واحد الفئة من لمغاربة كتحب فرانسا كثر من بلادها. فالفيلم كاين هاد الاحساس المزعج٬ ماشي غير باش جابو استاذ فثانوية “ليوطي” باش يهدر على تاريخ بلادنا٬ اللا٬ فامور كثيرة.

المهم لفضيحة لكبيرة كانت هاد الجملة اللي تعاودات جوج مرات.

لكن شكون المسؤول علي جريمة تمجيد الاستعمار وتحقير المقاومة؟ المسؤول الاول هو رضى بنجلون المكلف ف”دوزيم” بالافلام الوثائقية. هاد الفرانكفوني هو المسؤول الاول واللي خاصو يتحاسب على هاد الجريمة. فاي قناة فالعالم كيوقع بحال هاد الشي خاصو يمشي فحالو اولا. اللي كنعرفوه هو ان رضى بنجلون كيتزاد نفود يوم بعد يوم. كيفاش قناة عمومية توصل بيها الوقاحة توصف “مقاومة الاستعمار الفرنسي” ب”اعمال شغب”.

الثاني اللي عندو علاقة بجريمة تمجيد الاستعمار هي كاتبة السيناريو غيثة القصار. شكون جابها وشكون عطاها هاد الفرصة باش تهاجم المقاومة وترتاكب هاد الخطأ. عطاوها تكتب السيناريو ماشي حقاش فيدها. اللا. حقاش فرنكفونية وصافي. ديك الهدرة راني بغيت نهدر على عائلتي ووو ما بانتش. العلاقات كتوصل ناس ما فيدهمش لمشاريع كبيرة عليهم.

المسؤول الثالث على هاد الجريمة هو نبيل عيوش باطرون شركة الانتاج “عليان” اللي دارت هاد الفيلم واللي خدمات سيناريو ديك غيثة القصار.

غاديين تقولو لي وفين مسؤولية المخرج نور الدين لخماري وفين مسؤولية مدير “دوزيم” سليم الشيخ؟

كاينة مسؤولية ولكن فدرجة اقل. لخماري دار الاخراج لعمل. كان مكلف بالشق الفني. بالصورة. هنا دار خدمة نقية بزاف. الضيوف والخط الرابط اللي دار للفيلم وامور اخرى كانت مهمة هادوك اللي دكرناهم قبل. اما مدير “دوزيم” فراه عاطي ادارة الوثائقي لرضى بنجلون. يعني هو المسؤول الرئيسي والاساسي والشيخ مسؤوليتو ثانوية.

دابا يقدرو يحيدو ديك لفضيحة اللي عرضوها ليلة الثلاث ولكن تختار حلقة علي استعمار كازا واستقلالها وقدام هادوك الضيوف كلهم ودوز ديك لفضيحة او الجريمة راه ما يمكنش يمسحها تعديل المونتاج نهار تعرض هاديك الحلقة الثالثة الاحد 18 يونيو.

الحلقة الاولى غادية تكون الاحد 4 يونيو والثانية الاحد 11 يونيو والثالثة الاحد 18 يونيو والحلقة الرابعة والاخيرة تكون الاحد 25 يونيو