كود الرباط//
وزير النقل واللوجستيك الاستقلالي محمد عبد الجليل، خايف من لوبي الطاكسيات ومبغاش يرخص للتطبيقات الجديدة فالنقل واللي عندهم قبول كبير من طرف الموظفين ديال وزارتو والمواطنين فجميع القطاعات الخاص والعام.
فاش سولوه الصحافة اليوم فندوة المجلس الحكومي، على الاعتداءات المتكررة لي كيديروها صحاب الطاكسيات ضد سائقي التطبيقات، مقالش ندين هاد السلوك العنيف والهمجي. بل مشا بعيد وقال بلي هاد التطبيقات باش تكون خص موافقة من لوبي الطاكسيات الصغيرة والكبيرة.
فهاد الجواب، دافع الوزير على صحاب الطاكسيات الكبار والكيران والطوبيسات والطاكسيات الصغار وقال كيقومو بخدمة كبيرة للمغاربة.
وأوضح عبد الجليل بلي وزارتو طلقات دراسة لوضع تصور مستقبلي للتنقلات على مستوى المملكة ككل، من ضمن هاد القضايا لي غادي تدرس هو كيفاش نتعاملو مع هاد الطرق الجديدة للنقل.
