احمد الطيب كود الرباط//
أمين عام مجلس الجالية عبد الله بوصوف، صاحب الانتاجات الغزيرة، ومول الكتابات الكثيرة، كأن الشغل الوحيد لي عندو هو يكتب أما أوضاع الجالية آخر همو، ناض لبارح الأربعاء نشر رسالة الملك له فالفايسبوك بـ”سبونسوريزي” مخلص ادارة الفايسبوك باش تنتشر كثر. بوصوف نشر رسالة سيدنا تزامنا مع الخبار لي خرج “برلمان.كم” حول التحقيق معه رفقة قيادي في التقدم والاشتراكية وآخرين، فملف ثقيل وبتهم خطيرة.
غير هو بوصوف بلاصت ما يلتزم الحياد ويخلي القضاء يدير خدمتو، مشا نشر رسالة الملك اللي اصلا ماشي عاد خرجات، راه اكثر من اسبوعين توصل بوصوف بالرسالة حول كتاب نشرو مؤخرا هذا مسؤول غير عيطو ليه وخرج رسالة سيدنا من الأرشيف، يعني على هاد الحساب لي تلاقا الملك ولا خدا وسام يدير مبغا فهاد البلاد. راه اعتقال دنيا باطما دليل بلي بلادنا لا تفرق بين أحد في تطبيق القانون؟ وكبار المسؤولين كيتم التحقيق معهم سواء كانوا دبلوماسيين أو منتخبين أو مسؤولين عموميين.. هادشي جاري به العمل. بل أكثر من هادشي، بوصوف دار بيان توضيحي، كيمن على البلاد، وجبد “جملة من المحطات والمناسبات والأنشطة لي دار وعشرات الإصدارات العلمية والأكاديمية اللي كتب مدافعا على المغرب ووحدته الترابية”. الناس كادير كثر منك وساكتة. كتخدم لصالح الوطن في صمت بلا ضجيج بحال يلا كادير نتا.
وتنشر مقال يوم الثلاثاء في موقع برلمان، كيهضر على التحقيق مع عبد الله بوصوف، الأمين العام لمجلس الجالية، وسعيد الفكاك القيادي في حزب التقدم والاشتراكية، ومن معهما، وذلك للاشتباه في ارتباطهم بفضيحة “تمويل ادريس فرحان بوق للدعاية المغرضة يهاجم الملكية والمؤسسات الدستورية والمصالح الأمنية المغربية” وفق الموقع.
اهم حاجة خص يوضحها بوصوف : واش كيمول ادريس فرحان ولا لا؟ طبعا مجاوبش على هاد السؤال ودار توضيح كيعاود فيه الانجازات لي دار.
