كود اسماء غربي ///

الاحزاب السياسية مهمشة فتعيينات السفرا اللي دارت فاخر اجتماع للمجلس الوزاري هادي يومين. 19 سفير تعين فدول فكاع القارات ولا سياسي واحد. ناصر بوريطة وزير الخارجية والتعاون اللي وجد جزء كبير من هاد اللائحة ما تسوقش للاحزاب اللي ديما كيطلب منهم يدعمو ودعم الديبلوماسية المغربية. السيد دار اخطاء كثيرة اخرها تدبير عودة لمغاربة اللي حاصلين برا. كارثة بكل المقاييس ونهار جا للبرلمان كلشي كان ضريف معاه. حتى حزب ما دار الحد الادنى من خدمتو كجهاز رقابة علي الحكومة. 

هاد الاحزاب اللي كتصوت على قراراتو ما كيحملهش بوريطة. كيبان من تعيينات السفراء الاخيرة كيحتاقرهم. كيفاش دار تعيين من الباطرونا من خلال نبيلة فريدجي وما عين حتى شي حزبي. كاينة الكفاءات. كاين الاطر المزيانة. 

ماشي غير همش الاحزاب بل تحيدو سفراء متحزبون من مناصبهم بلا ما ياخدو شي حاجة، كاين اللي لعب عامل السن فهاد الشي وكاين اللي تهمش: الاتحادي بوغالب العطار اللي كان فكوبا كبير فالسن يرتاح شوية ولكن ما عوضوش شي شاب اتحادي قافز. كاين استقلالي تحيد من الجزائر اللي هو حسن عبد الخالق ولكن ما عطاوه حتى شي سفارة. بوريطة باغي يعطي الانطباع ان فضيحة قنصل المغرب فوهران كيتحلمها هاد السفير. 

من الناس اللي قلص من هيمنتهم على التعيينات اللي عرفها المغرب فالسنوات الاخيرة الياس العماري الامين العام السابق للبام ورئيس جهة طنجة تطوان الحسيمة السابق. الياس العماري عندو شي سفرا باقي ليه ديال بولونيا عبد الرحيم عثمون.. ولكن طيرو ليه عبد السلام ابو درار من لندن. المرض لعب دور ولكن ما دار والو فخدمتو. نجح يمكن يدخل راجل بنتو سليمان بنالشيخ للفوسفاط بعد ما كان دوز تجربة فاشلة فمجلة للتاريخ بتمويل من الياس العماري او جاب ليه صحاب لفلوس. 

بودرار كان يستقبل الياس كثر من الوزرا باش كيمشي للندن. يتلقاه هو براسو فالمطار ويدخل من بلاصة الشخصيات. دابا هاد الشي ولى من الماضي

واحد اخر محسوب علي الياس العماري مشى هو المختار گامبو سفير المغرب فكينيا. طار من بلاصتو ما خدا والو. قبلو كان بوريطة طيح سفير اخر محسوب علي الياس العماري اللي هو مصطفى الريفي اللي كان فالڤاتيكان. 

بوريطة كان كيقفقف باش يعيط عليه الياس العماري واليوم حيد كاع شي حد فيه ريحتو. بقاو شي سفرا دابا يطيرهم مستقبلا