كود هناء ابو علي ///
التعليم فالمغرب كلشي كيهدر على خاصو يتغير وللي قرب منو وزعم وبغى يبدل شي حاجة قودها وبزاف. دابا جا وزير اسمو شكيب بنموسى بخبرتو لكبيرة ماشي على رأس اللجنة المكلفة باعداد النموذج التنموي بل حتى باش كان وزير للداخلية وبعدها فالديبلوماسية كسفير للمغرب فباريس.
بنموسى دار قرار اليوم حرك بيه نقاش كبير. كلشي نسى باقي التغيرات اللي غادية تدخل ف”إجراء مباريات توظيف الأطر النظامية للأكاديميات (أطر التدريس وأطر الدعم الإداري والتربوي والاجتماعي)” وركز غير على شرط واحد وهو “تحديد السن الأقصى لاجتياز المباريات في 30 سنة” يعني اللي كبر من هاد السن ما يدخلش للتدريس.
دابا اللي كيبان هو كاينة تيارات كتهاجم هاد القضية رغم انو شرط منطقي. هاد الطالب اللي قرا فالجامعة وبقى مشومر حتى يوصل ل40 عام او 45 عام واش هو اللي بغيتوه يقري ليكم ولادكم؟ ابدا كلشي غادي يكون ضد تدريس بحال هاد العينة ولكن كاينين ناس مهاجمين بنموسى بسباب قرار معقول.
ايلى بغيتو التعليم يتغير٬ خاصو جيل جديد. راه ماشي غير التعليم اللي فيه هاد الشرط. وظائف اخرى فالوظيفة العمومية دايرة شروط واضحة كتهم السن.
وزارة التربية الوطنية بررات هاد القرار بللي الهدف منو هو “جذب المترشحات والمترشحين الشباب نحو مهن التدريس، وبغية ضمان التزامهم الدائم في خدمة المدرسة العمومية علاوة على الاستثمار الأنجع في التكوين وفي مساراتهم المهنية”. يعني ايلى عندك جوج معلمين صغار واحد مزيان ولاخر عيان٬ الدولة تقدر دير تكوين للعيان باش يهز النيفو ديالو والنيفو ديال المدرسة العمومية.
الشروط الاخرى معقولة جدا. راك خاصك تجيب المتفوقين وتختارهم قبل. مزيان تجيب اللي عندهم ميزة فالباكالوريا مزيانة واللي عندو نقط طالعين فالاجازة. مزيان تخلي هاد الاساتذة المستقبليين يكتبو رسالة يشرحو فيها علاش بغاو يقريو. هاديك ليتر دو موتيڤاسيون راها مهمة بزاف
فتعليمنا المريض المدگدگ باراكا ما تزيدو دگدگوه. خاصو جيل جديد صغير ختار المهنة باقتناع. ممكن تكون عندك اجازة بالنقيل والغش ولكن دارو ليهم فيلترات كثار باش يهزو من النيفو ديال التعليم. هادي خطوة اولى.
