كريم الشركي – كود///

الصحافة للاسبانية جاتها صدمة كبيرة بعد رفع السرية على وثائق مخابراتية أمريكية خاضة بأزمة الصحراء اللي وقعات في 1975، فاش كان الجنرال فرانكو مريض كيموت.

الوثائق بينات أن الميريكان كانت خايفة من انهيار نظام فرانكو لي كان حليف ليها، ودخول الاسبان في نادي الدول الديمقراطية، وهادشي غادي يخسرها حليف مهم في المنطقة.

الميريكانيين دارو صفقة مع خوان كارلوس لي تواصل معاهم عبر السفير الامريكي في مدريد، وأصبح خوان كارلوس لي أمير كيتعامل مع الميريكان وكيعطيهم خبارات سرية بزاف على بلادو مستغلا مرض فرانكو.

خوان كارلوس غايرجع حاكم اسبانيا بالنيابة، هادشي لي خلاه يساعد الميريكان والمغرب ياخذو الصحرا، باش واخا رجعات اسبانيا ديمقراطية غادي تبقا الصحرا كقاعدة للميريكانيين، وفنفس الوقت أمريكا غاتعاون خوان كارلوس يرجع ملك اسبانيا كيف كانت عائلتو قبل ما يطيرهوم فرانكو.

الصحافة الاسبانية وصفات تسريب اسرار الدولة، ومنح المقاطعة الاسبانية رقم 53، اللي هي الصحرا للمغاربة، بمثابة خيانة عظمى، وهادشي ديار بوليميك كبير عند الجيران.