وكالات //
نهار الثلاثاء الفايت، ميريكاني سميتو “Michael Morgan” فولاية نيويورك سخن عليه راسو وتيرا بالقرطاس على السيرڤور “Matthew Jeremiah Webb”، فريسطو تابع ل”ماكدونالدز” فمنطقة “بروكلين” حيت عطاه فريت باردة.
جورنال “نيويورك بوست” قال بللي المجرم (20 عام) جبد الفردي وتيرا في الضحية (23 عام)، اللي تعتقات حياتو فآخر لحظة وهزوه لصبيطار “Brookdale Hospital” فبروكلين، مضروب فعنقو وحالتو خايبة بزاف، فالوقت اللي البوليس شدو مول الفعلة ووجهو ليه تهمة محاولة القتل.
ولاية نيويورك معروفة بالحوادث ديال التير بالقرطاس بشكل كبير وخصوصا فبحال هاد البلايص ديال الخدمة، وكل عام كيطيحو العشرات من الضحايا بسباب الاستعمال العشوائي والإجرامي للسلاح، وأيضا رجعات الهضرة عاوتاني على شروط السلامة و الأمن فأماكن العمل.