كريم الشركي-كود///

البرلماني فالاتحاد الاوروبي، منير الساطوري المغربي الاصل، هرس لينا راسنا بانه دافع على المغرب، وبأنه استنكر قرار اسبانيا علاج ابراهيم غالي مجرم حرب، وبأنه مغربي ولكن فوقت المعقول نسى هادشي كولو وكان واحد من اللي طحنو المغرب وبغا يغرق لبلادو الشقف.

الساطوري اللي منحدر من آسفي، مشى صوت مع المجموعة النيابية ديال الخضر اللي كتدافع على البيئة، طبعا قرار التصويت ماشي ملزم لأي برلماني يتبع مجموعته النيابية، هادشي وقع فعدد من المجموعات، لي نصها صوت ضد المغرب ونصها صوت معاه، ومنها حزب الخضر لي كينتمي ليه هاد الساطوري.

هادي طبعا فضيحة ليه، حقاش بين انه مغربي غير فوساىل الاعلام المغربية، وبين انه كيهتم غا بمصلاحتو فدهاليز البرلمان الاوروبي، خصوصا ملي بان ان برلمانية تونسية الاصل صوتات لصالحنا ومانساتش أنها مغاربية، وصوتات لصالح دولة من المغرب الكبير.