كود الرباط هشام اعناجي //
انطلقت صباح اليوم الأحد 9 فبراير 2020 بالرباط، مسيرة كبيرة باش يقولو اللا ل”صفقة القرن” اللي جابها الرئيس الأمريكي دونالد ترامب لوضع حل نهائي للصراع الفلسطيني الاسرائيلي.
المتظاهرون وصلو مع الصباح وهزو شعارات كتندد بهاد الصفقة اللي قبلاتها دول عربية. وكيشارف فالمسيرة ممثلين عن الأحزاب السياسية وشخصيات حقوقية وفعاليات جمعوية. كاين الاستقلال والعدالة والتنمية والاتحاد الاشتراكي والتجمع الوطني للاحرار والتقدم والاشتراكية والاشتراكي الموحد بالاضافة الى جمعيات ونقابات وشخصيات. طبعا هاد الاحزاب السياسية جاية باش ما تخويش المسيرة للعدل والاحسان اللي ديما فهاد المسيرات كيستعرض قوتو.
حسب ما عاينتو “كود” فبداية هاد المسيرة كاين انزال كثير لأنصار جماعة والعدل والاحسان. هي اللي باينة مسيطرة على هاد الحدث.
المحتجون هازين بزافت الشعارات ورددو عدد منها بحال “فلسطين ماشي للبيع..ولا تطبيع مع الاحتلال” و”يا حكام الهزيمة عطيو للشعب الكلمة” ، و”لا لا ثم للتطبيع والهرولة”، وشعارات اخرى رافضة للخطة الأمريكية للسلام في الشرق الأوسط.
يشار إلى أن ناصر بوريطة، وزير الخارجية والتعاون الإفريقي والمغاربة المقيمين بالخارج، سلم رسالة من الملك محمد السادس، إلى رئيس دولة فلسطين محمود عباس، تزامنا مع الجدل الدائر حول صفقة القرن التي جاء بها الرئيس الأمريكي دونالد ترامب، لوضع نهاية للصراع العربي الاسرائيلي. وخرج رئيس الحكومة باش يقول راه الحكومة ضد الصفقة. هاد الشي كولو باش يخففو من تصريح بوريطة فمجلس المستشارين “ما نكونوش فلسطينيين اكثر من الفسلطينيين” وباش يخففو من اول بيان رسمي للمغرب دارتو الخارجية وشدات لعصا من الوسط. مع مبادرات السلام اللي دارتها امريكا ومع حقوق الشعب الفلسطيني.
