عفراء علوي محمدي- كود//

مقدم البرامج المصري الساخر باسم يوسف عطا للمتخلفين درس فالأخلاق، خصوصا منهم الميزوجينيين اللي كيعتبرو المرا هي المسؤولة على التحرش بها بسبب لباسها، واللي خرجو ينشرو الجهل ديالهم بعد حادث تحرش واعتداء طالب على 50 طالبة فالجامعة الأمريكية فالقاهرة، منهم قاصرات.

يوسف حط فالصفحة ديالو الرسمية على موقع التواصل الاجتماعي “فيسبوك” فيديو قال فيها بللي المرا ماشي حلوة مكشوفة، وماشي بطيخة مفلوقة لجوج، وماشي مصاصة مكَجكَج عليها الذبان، ماشي طوموبيل محلولة وكلشي فيها باين، بل هي بنادم، كائن حي، عندو اختياراتو، وتشبيهها بالجماد انتزاع لآدميتها واحتقار ليها.

وزاد الإعلامي الساخر كيقول “من حق المرا تقرر آش تدير بجسدها، كيف منحقها تحس بالأمان فاش تنزل للشارع، وهذشي من المفروض نتجاوزوه ومايبقاش موضوع للنقاش أصلا”.

وأكد أنه ماكاينش مبرر لتحرش، والسبب الوحيد ديال التحرش هو المتحرش “والأزهر قالت براسها هذ الكلام، حيت إلى كان هو اللباس علاش كيتم التحرش بالمحجبات؟ وعلاش كبتم التحرش بالأطفال، وعلاش كيتحرشو المتزوجين واخا مامحرومينش جنسيا”، على حساب هضرتو.

وتعجب كيفاش المتحرشين المصريين كيتحرشو ببنات بلادهم، وفاش كايخرجو برا واخا يدوزو قدامهم العيالات عريانات ماكيقربوش ليهم، “حيت المتحرش عارف بللي الدول برا دايرة قوانين صارمة ضد التحرش، ومايزعمش يبسل على حتى وحدة، وبالتالي يستبيح غير بنات بلادو”، كيف قال.