عفراء علوي محمدي- كود//

علنو كل من جامعة محمد السادس متعددة التخصصات فبنكَرير (UM6P) وجامعة بن كَوريون فصحراء النقب فإسرائيل (BGU)، على توقيع شراكة حول مشاريع البحث العلمي والبرامج المستدامة فمجالات الزراعة والما والطاقة والترميم البيئي، مخصصة للطلبة وأساتذة الجامعتين.

وهذ الشراكة كتعتبر اللولة من نوعها بين جامعة مغربية وإسرائيلية، بخصوص موضوعات الاستدامة التطبيقية فمجال الزراعة والما والطاقة والترميم البيئي.

وأكد هشام الهبطي، رئيس جامعة محمد السادس متعددة التخصصات، أن تجميع مهارات المؤسسات العلمية والتكنولوجية فالبلدين بجوج غيكون عندو تأثير كبير على السكان فالمستويين المحلي والإقليمي، “حيت البحث العلمي عنصر أساسي فالتنمية، لا سيما فاش كيتعلق الأمر بالاستدامة، هذشي علاش كان هذ الموضوع أول خطوة فتعاوننا”، حسب تعبيرو.

من جهتو، قال دانيال شاموفيتز ، رئيس الجامعة الإسرائيلية، ان الجامعات بجوج عندهم بزاف ديال القواسم المشتركة، لا من حيث بيئتهم الجغرافية المتشابهة، ولا من حيث تركيزهم بجوج على البحث التطبيقي وأساليب التدريس المبتكرة.

واعتبر أن الجامعات بجوج فوضع مزيان للتعاون فالمشاريع المتعلقة بالتنمية المستدامة وتغير المناخ والمجال الأخضر، باش يقدمو مساهمات فالبلدين والمنطقة والعالم.

وراكمات جامعة بن كَوريون الإسرائيلية 50 عام من الخبرة البحثية فمجالات الاستدانة والتغير المناخي، أما جامعة محمد السادس، فمن ديما حاطة هذ الموضوع فمقدمة برنامجها البحثي والتعليمي، خصوصا فمعهد Green Tech (GTI)، اللي دار العام اللي فات، وكلية العلوم الزراعية والتخصيب والبيئة (ESAFE)، اللي دارت ف2015.

وهذ الشراكة داعماها شركتين دوليتين هوما OCP فالمغرب وICL فإسرائيل، وغيتم التوقيع على مذكرة تفاهم جديد فمنتصف أكتوبر.