محمد سقراط-كود///

بزاف ديال التعليقات في صفحة گود كتلقى فيها اتهامات لرجالات وأبطال الصف التنويري في المغرب كالبطل القومي احمد عصيد كيتاهموه بالعمالة للغرب وتلقي أموال ودعم خارجي من أجل نشر الأفكار التنويرية في المجتمع المغربي، وكاين إتهام واضح من طرف العمري وسمى فيه بزاف ديال التنويريين، وبأنهم كيتلقاو الدعم لإفساد شباب الأمة لي فاسدوا الفقر والتهميش وغياب المشاريع التنموية البنيوية، ولكن كي العادة غير كتوقع شي كارثة في البلاد كيردوها للإبتعاد عن طريق الدين، على أساس الدول لي تابعة هاد الطريق مطفراه وهوما تخيرهم بين يمشيو لفرنسا العلمانية أو إفغانستان الإسلامية غادي يختاروا طبعا فرنسا أرض الحريات باش يتشددوا على خاطرهم تم.

وفي الواقع راه كون ما الدولار ريال الخليج لي فرقات السعودية من ورا إقتحام جهيمان العتيبي للكعبة وسيطر عليها راه كاع منعرفو شي وهابية في المغرب أو تشدد وهادشي ديال قوة حرام وحلال، وهاد النقاب واللباس الأفغاني والطاكية ديال مسعود البرزاني وهادوك الكتوبة لي كانوا يتفرقوا قبالت الجوامع في المغرب ومكتوبة في ظهرهم يهدى ولا يباع، وهادوك تبرعات الجوامع والتمويلات للمتشددين والإرهابيين لي تفرقات في العالم، وهادوك المنح ديال الطلبة لي مشاو قراو في السعودية وجاو متطرفين، أما كون مشاو دابا في عهد بن سلمان كانوا يجيو أكثر تفتحا من لي مشاو لبلجيكا.

واش التمويل الخليجي وفلوس البيترودولار مكيتحسبوش تمويل خارجي عير حيت جايين من السعودية ولا كيفاش، ولا هاداكشي كيعتابروه مساعدة من خوتنا المسلمين باش يوريونا كيفاش نعبدو الله كما يعبدونه في فيافي السعودية وليس كما نعبده بطريقتنا المغربية الخاصة، وكاين شي وحدين نادمين حيت محتلتناش الدولة العثمانية وكنا ديما خارج أي خلافة إسلامية، بل كنا نحن الخلافة بطريقتنا ورجالاتنا، راه بحال فلوس السعودية بحال فلوس الغرب كلها تمويلات أجنبية هدفها تأثير في الأفكار والعقيدة ديال البلاد، الى كان شي واحد علماني شد شي ألف دولار من الغرب فراه اللحايا والمتطرفين شجو الضوبل ديالها في مية وألف من عند السعودية ودول الخليج فاش كانوا كيدعموا النسخة الوهابية المتشددة من الإسلام وباغين يصدروها للعالم، لذا بلا مايدوخ علينا شي واحد بهاد الخبير ديال حكا و الواد راه كاين دعم أجنبي لهاد العلمانيين راه الدعم سبق منكم نتومة اللولين حتى تدفنتوا فلوس.