عفراء علوي محمدي- كود//

قررات الهيأة العليا للاتصال السمعي البصري “الهاكا” توجيه إنذار لشركة “هيت راديو المغرب”، بعد التصريحات “التمييزية” ضد المرأة اللي دلى بيها الممثل طارق البخاري فبرنامج “Morning de Momo”، فإطار خلافو مع الممثلة نجاة خير الله، وطالبات الإذاعة بقراءة بيان “الهاكا” بهذ الخصوص فبداية البرنامج فالحلقة الأولى بعد صدور هذ القرار.

وتم تداول هذ القرار من طرف المجلس الأعلى للاتصال السمعي البصري خلال اجتماعو، الخميس اللي داز، بحضور رئيسة “الهاكا” لطيفة أخرباش، من بعد ما تبين للمجلس أن الإذاعة ماحتارماتش المقتضيات القانونية والأحكام الواردة فدفتر التحملات المتعلقة بمحاربة الصور النمطية اللي كتحط من كرامة المرأة، وبواجب حماية الحياة الخاصة، وتقرر إبلاغ الإذاعة بالقرار، ونشرو فالجريدة الرسمية.

واعتبرات الهاكا، فنص قرارها اللي توصلات بيه “كود”، أن تصريحات البخاري فالبرنامج اللي كينشطو محمد بوصفيحة الملقب ب “مومو”، فحلقة 26 أبريل، “كتكرس صورة دونية، تمييزية وقدحية للمرأة”، وفيها تطرق، “بطريقة مغرضة” للوضع الصحي النفسي لخير الله، الشي اللي كيشكل “مسا بالحياة الخاصة”.

وعوض ما تعترف الإذاعة بالخطأ ديالها وتعتذر على سماحها بإهانة المرأة، بعدما راسلاتها الهاكا للاستفسار، ردها دافع على طرح البخاري بشكل كبير بحيث قال مومو فالرد أن هذ الخطاب “مافيهش إهانة واضحة للأخلاق العامة، بل مبني على هضرة شائعة فاللهجة المغربية، واللي ماكتعتبرهاش ثقافتنا صور نمطية متحيزة ضد المرأة، بل تعبير شائع، فالغالب كيستعملوه العيالات براسهم”.

والمتدخل (البخاري) كان قال مجموعة من العبارات التحقيرية من قبيل: “كتبقى امرأة، كتبقى ولية”؛ “الله ياخد فيه الحق، أما هي كتبقى ولية”؛ “كنقصد أنها كتبقى واحد الكائن ضعيف ماشي فشخصيتو، رهيفة نفسو وحساس نفسو. حنا وجه العذاب وتمارة حنا الرجال”؛ “الله يشافيها عندها مشاكل نفسانية الله يشافيها، اشنو غنقولك مع احتراماتي للمستمعين الكرام، واحتراماتي لك واحتراماتي للجميع”؛ “كنقول لديك السيدة الله يشافيها”…

ورد مومو على هذ العبارات التمييزية خلال البرنامج ماكانش كافية حسب “الهاكا”، وماشي بالوضوح والحزم لمساءلة الصور النمطية اللي تضمناتها تصريحات المتدخل، ومافيهاش تحكم فالبث وواجب السهر على جدية ورصانة تناول الكلمة، بحيث قال مومو: “ياربي السلامة هاد الجملة كيفاش غادي تكمل (هاهاها)”؛ “لا ولكن بلاتي بحال المرأة بحال الرجل، راه كاينة امرأة، راه كاين شحال من عيالات لقيناهم رجل من بزاف الذكورة.”، وهذشي طبعا قبل ما سرجع ويدافع على هذ الصور النمطية بدعوى أن كلشي كيقولها.

وقرار “الهاكا” كانت متساهلة بزاف مع مومو فقراراها، حيت هذي ماشي أول مرة كيخالف قوانين “الهاكا” اللي كتضبط القطاع السمعي البصري، ومقتضيات دفتر التحملات وأخلاقيات المهنة، بحيث من ديما كيتشكاو بيه الناس،  آخرها لافير ديال مستخدمي الأبناك اللي وصفهم ب”الكالاخ”، وصحاب الطاكسيات اللي هانهوم، وإهانتو لفنانين كيف وقع مع “ميزو” اللي كان عندو ضيف فالبرنامج، وعدم احترام ضوابط الاتصال الإشهاري من خلال ذكر اسم شركة، وقضايا كثيرة أخرى…

قرار الهاكا هنا:

https://www.haca.ma/ar/%D9%82%D8%B1%D8%A7%D8%B1-%D9%85%D8%A3%D8%AA%D8%B3%D8%A8-%D8%B1%D9%82%D9%85-21-24