محمد سقراط-كود///
الشمال ومنطقة جبالة مافيهمش شي سوق كيعمر بالجمعة لأنها عيد المومنين ونهار ديال الصلاة، وبالنسبة ليهم غير المساخيط لي كيعمرو السوق الجمعة ولي هوما العروبية نظرا للصراعات القبلية بيناتهم فكانو كيلصقو أي حاجة خايبة في بعضياتهم ، وحقا غير تخرج على مناطق جبالة كتبدى تلقى أسواق كيعمرو بالجمعة في أغلب القبايل ديال الداخل، وبالنسبة للجبالة فراه بداية أرض المساخيط هي الجمعة دلالاميمونة، لي مابقاش كيعمر بالجمعة دابا ردوه للسبت واقيلة، هاد الفيلاج لي ملحقة ديال القصر المدينة المنسية هي ومحيطها، الناس تم عمر شي واحد تسوق ليهم أو داها فيهم أو عرفهم واش كاينين أصلا، من غير كعمال في الفيرمات خبارهم ماعارفها حد، مرة مرة غادي يتذكرو فشي كسيدة ولا كارثة حتى نفاجرات هاد البؤرة ديال كورونا عندهم وهوما يطلعو للواجهة.