28/04/2024 20:33
خريطة المغرب ضربت الكابرانات ألي وروتور ونهضة بركان طلعو للفينال بعد انسحاب اتحاد العاصمة
الوالي الزاز -كود- العيون////
دار رئيس المجموعة البرلمانية الفرنسية المتضامنة مع البوليساريو، جون بول لوكوك، ندوة فالبرلمان الفرنسي، باش يناقشو قضية الثروات فالصحراء المغربية.
هاد البرلماني عن الحزب الشيوعي اللي كيدعم البوليساريو دار الندوة وما تسوق ليها حد، ما حضروش برلمانيين فرنسيين ولا أعضاء السلك الدبلوماسي ديال الدول الإفريقية الداعمة للبوليساريو، واكتفى عدد قليل من الموالين للبوليساريو من دوك اللي عايشين ففرنسا بالحضور.
الندوة قدم فيها النائب البرلماني الفرنسي وجهة نظر البوليساريو ونظام العسكر الجزائري بخصوص النزاع، وطالب فيها الشركات الأوروبية والاتحاد الأوروبي يوقف أي اتفاقيات تجارية مع المغرب واللي كتشمل الصحرا، وقال أن ناس الصحرا ما مستافدينش من ثروات الإقليم واخا شايف الواقع التنموي كيفاش داير وآراء الوفود الأجنبية اللي كتزور المنطقة شنو كتقول.
البرلماني الفرنسي ومنذ دارو هاد المجموعة البرلمانية كيحاول ما أمكن يدير أي نشاط فالبرلمان الفرنسي باش يدعم البوليساريو، وخصوصا من بعد أي حدث كيوقع فالصحرا كتكون فرنسا عندها علاقة بيه، بحيث كتجي هاد الندوة بعد زيارة وزير الخارجية الفرنسية ستيفان سيجورني للمغرب وحديثو عن دعم فرنسا لمبادرة الحكم الذاتي، وأيضا بعد تصريحات السفير الفرنسي فالمغرب حول دعم المملكة التاريخي.
الغرض من هاد الندوات هو لفت الانتباه لنزاع الصحرا وترويجه ففرنسا بناء على تصور البوليساريو ونظام العسكر ومحاولة التشويش على التقارب الحذر فالعلاقات بين فرنسا والمغرب، وهو الأمر الذي يعد مستحيلا، خاصة وأن البرلمان والمشهد السياسي الفرنسي مؤمن بالعلاقات بين البلدين والشعبين من أقرب الشعوب، وزايدون أن انشغالات فرنسا متوجهة لبلايص نفوذها بحال إفريقيا، وكذلك مواجهة التحدي الروسي وبناء شراكة قوية فأوروبا ومع الولايات المتحدة الأمريكية.
