كريم الصوفي – كود//
[email protected]

الأحداث المتسارعة في سبتة خلات العديد من المغاربة ينساو الهضرة على انتقاد الحكومة بسباب استمرار السدان الليلي والرجوع إلى الساعة الاضافية ويركزو مع الفضيحة ديال حريگ آلاف المغاربة البارح واليوم لمدينة سبتة. هاذ الأحداث طغات بقوة على تقرقيب الناب بيناتهم في المقاهي بمجموعة من المدن.

داخل مقهى بمركز كازا، بزاااف ديال الكازاويين هضرو على كيفاش حسو بالفقصة والدونية وهما كيشوفو فيديوهات وصور في البورطابلات ديالهم، كتبين بحالا المغرب ولى سوريا أيامات الحرب والعديد منهم مابغاش يتفهم ليه كيفاش البلاد اللي حاربت كورونا بشجاعة ورائدة فـ التلقيح إقليميا وقاريا وعالميا وبنات سمعة عالمية مزيانة كلشي ضرب ليها فـ الزيرو.

كاين البعض من المواطنين اللي ما نعسش البارح وعاشوا ما يشبه الصدمة، بسباب مشاهد ومناظر اعتبروها مهينة بالكرامة ديالهم كمغاربة والعالم كلشي كيتفرج كيفاش وليدات صغار وشباب وعائلات مخاطرين بحياتهم وهاربين من بلادهم بطريقة غريبة، كتخلي بنادم يشك في كل الجهود اللي دايرها دولة كتبان في أعين دول العالم، أنها بلاد نامية وكتقدم راسها بإمكانياتها الذاتية، لكن حسب هاذ المواطنين، فاللي طرا كيوضح أن البلاد ولى فيها الجوع والفقر تزاد بزاااف بسباب الجايحة والأزمة..

البعض الاخر غير من خلال نبرة الصوت ديالو المتعصبة والعالية، بان أنه كفر على البلاد في مقابل تسويق صورة ايجابية على جيش اسبانيا اللي محتل لمدينة وبقا فيهم الحال بزااف لأن مغاربة فبلادهم وكيقولو عاش اسبانيا وكيفاش جيش محتل أرض مغربية كيهز اطفال وكينقدهم بكل إنسانية..