كود كازا//
قال الحقوقي والمؤرخ المعطي منجب، أنه مقلق بزاف على الصحة ديال الصحافيين المعتقلين، عمر الراضي وسليمان الريسوني اللي دايرين إضراب عن الطعام، وخصوصا الريسوني اللي حابس حتى الما.
وزاد منجب، فتصريحو ل”كود” من بعد حضورو ندوة لعائلة ودفاع الراضي، اليوم الاثنين، أنه من الصعب على الانسان يقطع الما والماكلة، فما بالك الى كان كيعاني من مرض مزمن وصحتو على قد الحال بحال الريسوني.
وقال انه سول اطباء، وقالو ليه أن الانسان الى وصل لليوم الخامس بلا ما ولا ماكلة يقدر يولي ف”نقطة اللاعودة”، وممكن صحتو تتضرر بزاف من بعد.
وخلال الندوة، طلب منجب من المحامي ميلود قنديل، دفاع الريسوني، باش يشوف شي طريقة للتواصل معه، من اجل إقناعو فتعليق الإضراب عن الماء، واخا الأخير ولا رافض هذشي وقطع حتى التيليفون فاش دخل فهذ المعركة.
وكان هذ الايام راسل المعطي منجب الريسوني، ونصحو باش يعلق اضرابو عن الطعام، او على الاقل الماء، مقابل شرب لترين من الماء يوميا والمشي فالساحة فالحبس خلال الفسحة.
