سهام البارودي – كود//
رمضان على الأبواب و كيما ديما قبل مايدخل كايبداو عباد الله يوجدو ليه المونة ديالو فحالا كايوجدو لشي حرب ! الحوانت المارشيات الاسواق كولشي عامر و عباد الله كاتقدا بالكيلوات و الكراطن !
لي اثارني انا هاد العام هوا واحد الهاشطاغ شفتو كايدور فوسائل التواصل الاجتماعي #ستر_بنتك و خلي الناس تصوم ! ستري راسك و خلي الناس تصوم ! هاد الجملة ديال ” خلي الناس تصوم” بالضبط كاتجيني ماعندها تا معنى ! ياك الصيام فالاساس الهدف ديالو هوا الانسان يتعلم يتجاوز الشهوات ! ايوا علاش عباد الله كاتحس بيها على سبة ! باغين الحسنات و الأجر و باغينهم باردين ! و باغين الناس الاخرين يوفرو ليهم گاع الظروف باش يصومو !
صوم لاكنتي باغي تصوم ! و ديها فراسك ! و حدر عينيك ! و قاوم الشهوة ! ماكاين لاش تفرض على عباد الله كيفاش يلبسو ! هادشي كايتسمى حزموني و رزموني و لا تعولوش عليا.
المصيبة انه النفاق الاجتماعي لي كايعيشوه المغاربة فالواقع كايمتد الصدى ديالو حتى لوسائل التواصل الاجتماعي و كاتشوف گروبات و صفحات كانت مثلا متخصصة في الطبخ كاتقوليك بلي غاتحبس المنشورات على الطبخ بمناسبة رمضان ! و صفحات متخصصة فالموسيقى غاتحبس المنشورات على الموسيقى ! حتى واحد الصفحة متخصصة فالشراب قالك ليزادمين ديالها غايحبسوها بمناسبة رمضان !
انا السؤال لي كانطرح على راسي هوا واش ضروري تحبس الحياة فرمضان ؟ علاش هاد الناس ماكايقدوش يعيشو حياة طبيعية و يمارسو العبادات ديالهم بلا مايطلبو بتعطيل المجرى الطبيعي للحياة ؟ شنو غايطرا لا صمتي و لقيتي قدامك وصفة طبخ و لا تصويرة ديال شي أكلة فالفايسبوك ؟ شنو غايطرا گاع لا شفتي قرعة ويسكي ؟ و من بعد ؟ ياك الناس كاتصوم فأوروبا و آسيا و أمريكا وسط العرا و الطاسة و القحوب و كلشي و حتى حاجة ماكاتمنعهم يصومو ! الا دياولنا كايبغيو كلشي ينخارط معاهم فالصيام و كلشي يوفر ليهم ظروف الصيام كيما بغاوها تكون واخا هاد المسألة بحد ذاتها راها ماكاتوافقش مع الهدف الأساسي ديال رمضان باش تعرف شحال بنادم مشقلب فمخو.
