كود كازا ///

رهانات كأس افريقيا للامم عند المنتخبات المشاركة فايتة كورة القدم. شفنا رئيس غينيا اكواتوريال جمع لعابة المنتخب وهددهم قال ليهم ما درتو والو غاديين ترجعو لفلوس اللي خسرنا عليكم. طبعا هاد العسكري ما هامو لا فلوس لا كورة. اللي هامو هو السياسة. باغي يضحي بمنتخب بلادو باش يبان حريص على اموال شعب ما ختاروش.

الضغط كاين طرق كثيرة ليه. المنتخب المرشح للفوز بهاد الكاس اللي غادية تبدا نهار 9 فهاد الشهر هو منتخب السينغال٬ تزاد عليه ضغط كبير اليوم 4 يناير 2022. الضغط جا بعد استقبال رئيس لبلاد ماكي سال للاسود. الرئيس للي خدم بلادو ورجعها قوة اقليمية وبدل فيها امور كثيرة٬ عندو حتى هو رهان كبير ومحتاج لهاد الجيل الذهبي اللي عند هاد المنتخب يجيب ليه كأس افريقيا. اليوم فاستقبالهم بالقصر الرئاسي قال ليهم بوضوح “الكاس وما كاين غير الكاس” وزاد باللي التحدي اليوم ماشي تلعبنهاية كأس افريقيا. كيلوح لمعاني على النهاية اللي خسروها فاخر كان ضد الجزائر بمصر.

فتقليد سينغالي عطى رئيس الجمهورية الدرابو للعميد كاليدو كوليبالي للي بعد ما شكر الرئيس قال “نموتو ولكن ما نذلوش” الدرابو. خطاب عسكري لقاه عميد المنتخب. وسالا هاد الخطاب العسكري “عندنا الرغبة نلعبو ونربحو. غاديين نرجعو فرحانين بعد ما نكملو المهمة. عاشت السينغال. والى الامام. راه حنا واجدين”.