كود مراكش//

واش والي جهة مراكش خلق قوانين بوحدو؟، كتساءل مصادر محلية بمدينة مراكش، مور القرار بعدم السماح لأسواق القرب النموذجية والسويقات الشعبية المتواجدة بكافة النفوذ الترابي لعمالة مراکش بالاشتغال إلا من الساعة السابعة صباحا إلى الساعة الواحدة بعد الزوال، زاد قرار غريب يتعلق بمنع   إركاب أي شخص زيادة على سائقي الدراجات النارية أو العادية أو العربات ثلاثية العجلات (triporteurs) ابتداء من تاريخ صدور هذا القرار حتى إشعار آخر.

مصادر محلية استنكرت هادشي، وقالت :”كيفاش المواطن لي كيخدم وكيهز معه مرتو من الخدمة باش يوصلها للدار ولا ولدو، واش يمشي هو ف موطور ويصيفط مرتو ف طاكسي صغير الى لقاتها ف الجايحة”.

هاد الوالي ديال جهة مراكش كريم قسي لحلو غريب مثير. دار قرار بوحدو بمنع بيع المشروبات الكحولية، دار قرار بوحدو ف الولاة ديال المغرب.
ومن بعد لغا هاد القرار.

قرارات كيعتبروها مصادر محلية بأنها “غير منطقية ولا تخدم الساكنة وغاتسبب الاحتقان ومعندها تا معنى ف محاربة كورونا”.

واستند الوالي الى القانون لي كيتطم حالة الطوارئ الصحية بسائر أرجاء التراب الوطني لمواجمة تفشي فيروس كوروناكو فيد 19.

وزاد الوالي بتهديد العاملين ف الاسواق ولي خالفو مقتضيات هذا القرار، بمنعهم من الممارسة فورا ناهيك عن المتابعات المنصوص.