محمد سقراط – كود

—

عبد الوهاب رفيقي من بين السلفيين لقلال لي دارو مراجعة فكرية حقيقية ، وخرج بمواقف جريئة لي كتخص تجديد الخطاب الديني ، وآخرها موقفه حول المساواة في الإرث لي خرج بيه مؤخرا ، ولي جبد عليه الصداع ونوض كاع اخوانه بالأمس باش يكفروه والبعض منهم هدر دمه كاع ، وتم هادشي في ظل غياب تام للتضامن معاه ، أو حتى تأييد الرأي ديالو وتشجيعيه على مثل هاد المواقف الشجاعة والمتنورة لي كتجي من فقيه سلفي سابق ، ومر هاد التصريح مرور الكرام ، واخا راه جا من طرف رجل عندو قيمة وأثر فالمجتمع المغربي .

حتى أنا ماقدرتش نتعاطف معاه إثر الهجوم لي شنه عليه اخوانه الى امد قريب ، حيث بالنسبة ليا عبد الوهاب رفيقي حاليا معندو حتى تأثير على المجتمع وكلمته غير مسموعة بتاتا ، على خلاف أبو حفص لي قدر يشحن العديد من الأفراد وكان له أثر كبير في تشدد الكثير مما سبب فكوارث فالمغرب ، وبالنسبة ليا أنا كفرد أبو حفص كان عندو أثر على أفراد من عائلتي لي بسبابو شخصيا النسا دارو النقاب حتى الطفلات منهم ، والرجال تشددو ، وواحد منهم مات فسوريا ، أييه هاد الوقت كان تراجع أبو حفص على داكشي ولكن أثاره بقات حاضرة فالعديد من الأوساط ، أما حاليا مثل هاد الآراء الفقهية المتنورة لي كيخرج بيها راه معندها حتى شي قيمة فالمجتمع ، حيث كيقولها وهو لابس كومبلي فبرنامج حواري ، وماشي وهو ضارب العمامة والقميص فوق شي منبر جامع عليه شعيبة وكيشحن فيهم مباشرة ، بالمواقف الحداثية كيما كان كيدير نهار كان كيشحن فيهم بالأصولية .

بالنسبة ليا لا هاد الموقف لا أي موقف آخر ، سواء من أبو حفص أو أي واحد من شيوخ السلفية لي دارو مراجعة فكرية ، ماغادي يمسح الآثار التخربية ديالهم على المجتمع المغربي أيام كانو سلفيين ، هاعلاش ماتعاطفتش معاه حيث موقفه الآن لا قيمة له ، ولا يمسح ولو واحد فالمية من التشدد والأصولية لي نشرها وسط الناس أيام كان متشدد ، والأثار السلبية ديالو على المجتمع كثر من ايجابيات مثل هاد التصريح ، هاعلاش وأنا كنشوف إخوانه بالأمس يهدرون دمه ، مكنعتابرش الأمر تهديد لحرية الرأي والعقيدة أو هجوم لظلاميين على واحد متنور ، وإنما غير خلاف عائلي حول أمور فقهية وصافي .