سهام البارودي – كود//
الصحفي رضوان الرمضاني كايتعرض لواحد الحملة بشعة من طرف الظلاميين لي عايشين معانا ! دوك الناس لي مع هاد الفاجعة ديال كورونا لقاو راسهم فجأة فالتوش ! هوما لي حياتهم كاملة و هوما عايشين على اساس انهم مهمين بزاف للمجتمع و كايروجو لديك الهضرة ديال ” بغينا مساحة فالاعلام” ” بغينا العلماء ديالنا يبانو” ” حنا عندنا الحل لجميع مشاكل المجتمع” و كايصحاب راسهم راه عندهم الحقيقة الكاملة و قادين بما أوتو من كوتوكوتو يعالجو اي مشكل او وباء او قضية اجتماعية ! و مع اول مأزق لقاو راسهم فالتوش ! كلشي قال ليهم تسوخرو عافاكم و خليو الناس د العلم الحقيقي يهضرو ! حيدو نتوما و هضرتكم و الكوتوكوتو لي فالحين فيه و خليو الاطباء و العلماء دبصح يدويو ! و لاحظو كيفاش انه المجتمع كايلفظهم حيت الغميق ديالهم مابقاش واكل!
مارضاوش!
مارضاوش!
آو ! كيفاش هادشي ؟! كيفاش كاتقولو لينا حنا ماصالحين لوالو ! و الكوتوكوتو ديالنا ماصالح لوالو ! كيفاش غادي تفضلو على الكوتوكوتو ديالنا النشيد الوطني ؟! كيفاش غاتفضلو على الكوتوكوتو ديالنا الهضرة د الأطباء و العلم و المنطق ؟! كيفاش حتى تقصينا من المعادلة و حنا من ديما مآمنين بأنه حنا لي كانمتالكو الحق و الحقيقة ؟!
راه خاصك تفهم سيكولوجية الانسان الظلامي باش تعرف شنو طاري فيه هاد الايام ! فحال داك لي باش يصيد شي بنت كايبقا عليها ” نشدك نمحنك” و نهار وصل معاها للفراش لقا راسو كايعاني من الضعف الجنسي! من ديما نافخ علينا سدرو و فارع لينا راسنا بالامجاد و العلماء و احسن أمة و فاش طاح للضس لقا راسو اليوم مع هاد الجائحة د كورونا داك ” العيلم” ديالو كامل ماصالح لوالو كونكريطمو ! و ديك قوة الهضرة العاطفية و القصص الخرافية و الثقة الكذابية لي عندو فراسو ماكاينيش! صدقو وهميين! كايتخايلهم غا فمخو ! لقا راسو فعلا ماساوي والو فسوق البشر و بلي الدور ديالو فالمجتمع سالا شحال هادي يامات نوضو ترگدو !