حميد مسافي – كود//
هادي اسبوعين وكاع المنخطرين فنظام المقاول الذاتي مكيقدروش يدخلو للسيت باش يصرحو برقم معاملاتهم لي بناء عليه كيخلصو واحد الضريبة من تلت شهور لتلت شهور.
هاد النظام لي موقعه الالكتروني وبرنامجه المعلوماتي عامر مشاكل وعيوب فكل مرة كيطيح وكيوقف وكيعرض الناس لي منخرطين فيه لتاخر كبير فأداء الضرائب الشيء لي كيعرضهم هاكاك لاداء واحد الضريبة ديال 500 درهم.
الشباب المنخرطين فهاد النظام لي تم استحداثه من اجل مساعدة الشباب على هيكلة الخدمة ديالهم و يوليو قادرين يعطيو فاكتورات مازاد غير كفسها عليهم مع هاد الاعطال الدائمة فالسيستيم و مع الارغام ديالهم على الذهاب حتى للبريد باش يخلصو فيه مع العلم ان اغلب الشباب كيتعاملو بالسمارتفون يعني كان احسن يديرو ليهم غير شي خدمة الكترونية يخلصو فيها بدل هاد التسخسيخ والتعقيدات والصعوبات لي حشومة تكون فمغرب 2019.
