محمد سقراط-كود///

حسب السلاوي شخصيا اللقاح ديال كورونا باقي خاصو الوقت، وحتى كاع ملي يتلقى خاصو مدة للتصنيع بأعداد ضخمة وفوقاش يوصل ويتوزع، يعني راه كورونا حرب حقيقية طويلة الأمد ومنهكة نفسيا وإقتصاديا، داكشي بحال حصار لينينكراد غير هو مكنتمناوش توصل بينا الحالة لداكشي كامل، ولكن عموما هاد الكلاس في الدار والترقب والتباعد الإجتماعي وشي ساد وشي حال ربما كيضيع علينا فرصة ديال تكوين مناعة قطيع فهاد الصيف مادام الفيروس ماكيقتلش بزاف في المغرب حسب وزارة الصحة وأغلب المصابين بلا أعراض، إذن منطقيا راه خاص يتطلق بنادم يسعى في الأرض فرحا ومرحا وتمارة وتكرفيص باش يجيب طرف ديال الخبز.

نهار السبت مشيت للسوق الأسبوعي ديال بنسودة، غير أنه عامر كانت شي حاجة كتفرح وكتعني عودة الحياة لطبيعتها ولو غير بشوية، السوق كان خاوي حتى البياعة والشراية كانو فيه قلال وكذلك المتسوقين حاجة لي كتخلع وكتخلي الواحد يدير سيناريوات كحلة على المستقبل، لي جايب شي سلعة راه تقريبا حاصل فيها الرواج ميت، ولكن مع ذلك غير فكرة أن السوق عامر راه حاجة تخلي النفسية ترتاح، ولكن نهار الحد مشيت للسوق الأسبوعي ديال عوينة الحجاج لقيت البياعة والشراية جاو ودقو كياطنهم وهوما يوقفوا عليهم المخزن بوليس ومخازنية وقايد وباشا وجمعو داك السوق، سولت واحد القايد واش السوق كيجمعوه بسباب كورونا قالي آه، البلان غير منطقي بتاتا كورونا مكايناش فبنسودة ولكن كاينة فعوينة الحجاج ومكايناش في المول ديال برج فاس ولكن كاينة فسويقة شعبية.

بزاف ديال السواقة راه كيجيو بالليل ويباتو شادين البلاصة وفالصباح بكري يبداو يطلقو سلعتهم، كون غير تعلمو من قبل تجي هانية ولكن الأسواق الأسبوعية تقريبا مطلوقة في المغرب كامل وفي فاس نيت راه بنسودة كان عامر فيها السوق وعوينة الحجاج جاو نوضوهم بدعوى كورونا، هادشي عادي أننا نشوفوه في بداية الجايحة، ولكن دابا لي العالم كلو كيتعايش معاها وكيرجع للحياة الطبيعية وحنا بلاد لي فيها الموت قليلة بزاف، ومع ذلك باقي العامل والباشا كيحرمو الناس من رزقهم خوفا على صحتهم، وهوما هادوك لي جاتهم كورونا وفالسبيطارات راهم صح من ظالم عاطيينها للقص والنعاس، راه غير منطقي يبقى هاد الزيار حتى لهاد الدرجة، البلاد كلات لعصا ديال بصح والمغاربة مستاعدين يخرجوا ويغامرو بحياتهم على طرف ديال الخبز، وهادي فرصة للمغاربة أنهم يكتاسبو مناعة القطيع تدريجيا إستعدادا للعام المقبل في حالة ماوقعاتش شي معجزة، إذن خليو بنادم يخرج يقلب على طرف ديال الخبز.