عفراء علوي محمدي- كود//

صدر رئيس جماعة اغرم نوكدال قرار جماعي، باش يتم إغلاق ومنع البيع فالسوق الأسبوعي المتواجد داخل المجال الترابي للجماعة، وباش ينفذو هذ القرار السلطات المحلية والدرك الملكي ومصالح الجماعة.

وحسب نص القرار اللي تم توقيعو اليوم الإثنين، وحصلات “كود” على نسخة منو، كيجي هذشي فإطار التعبئة الشاملة اللي انخرطات فيها مؤسسات الدولة، ومواكبة لإعلان حالة الطوارئ الصحية، وبالاعتماد على المقاربة الوقائية الاستباقية لوباء “كورونا” والحد من احتمال تفشيه بهدف الحفاظ على صحة وسلامة المواطنين.
وتوجهات نسخ من هذ القرار لكل من عامل إقليم ورززات قصد الإخبار، وقائد قيادة اغرم نوكدال، وقائد الدرك الملكي بالمنطقة، وشركة بولاريا اللي كتشرف على هذ السوق الأسبوعي.

وللإشارة فالسلطات فعدد من المناطق بدات كاتسد فالأسواق الأسبوعية وغير النظامية، وكتجري على صحاب الكرارص فسواق الخضرة، باش يقللو من التجمعات ويبقاو غير صحاب المحلات والحوانت الكبار.