نجوى المالحي-كود//
الرابورة المعروفة باسم “بسيكو كوين” لي تعرضات لاعتداء خطير في الصخيرات منتصف الأسبوع لي داز، دشنات هاشتاكَ جديد #tous_avec_psychoqueen” مع هاشتاكَ #لا للعنف ضد المرأة” باش تلفت الانتباه لقضية الاعتداء الهمجي لي تعرضات ليه.
الرابورة أكدات أنها ماغاديش تسكت على هاد الحكَرة، وقالت “التحرش والا هضرتي على راسك يتهرس لك نيفك ونفسيتك. شنو واش خاصنا نسكتو؟ ولا نديرو عين ميكة. كانت ليلة مأساوية. صور راسخين في عقلي فينما نغمض عيني كنشوف داكشي لي طرالي كيتعاود. راه ماشي البلاد لي فيها المشكل، ولكن عقل بنادم فيه الخلل”.
وكثر القيل والقال على قصة العنف لي تعرضات لها بسيكو كوين، لكن لحد الآن مازال ماحدداتش هوية لي تعدى عليها باش تنفي أو تأكد أن حبيبها السابق هو لي صفا شي حساب قديم كان جامعهم ودار شرع يدو بطريقة وحشية.