الخارجية البريطانية: ما عندنا حتى تعاون مع المغرب فمجال الطاقة النظيفة والمناخ فالصحرا
گود سبور//
طلع عبد المجيد البرناكي رئيس جديد للوداد الرياضي، فبلاصة سعيد الناصيري، وهاد الشي خلال الجموع العامة اللي سالات فالساعات الأولى من صباح اليوم الجمعة، بعد مناقشة التقارير المالية والأدبية والتصويت عليها من طرف المنخرطين والمرور إلى جمع عام استثنائي انتخبت فيه لائحة كانت وحيدة برئاسة عبد المجيد البرناكي النائب السابق للرئيس واللي تولى دابا رئاسة النادي بشكل رسمي.
وهضر سعد الدريب عضو المكتب المديري للوداد الرياضي، فتصريح لميكرو “گود”، وقال بعدما سالات الجموع العامة: “الجموع العامة للوداد الرياضي دازت كعرس ودادي وفجو عائلي وتمت المصادقة على جميع التقارير الأدبية والمالية من موسم 2019- 2020 حتى 2022-2023، والأمور دازت عادية وكانت أسئلة المنخرطين ودازت الأمور بسلاسة وشفافية وحنا ما كنتخباوش وكنشكرو المنخرطين على ثقتهم فعبد المجيد البرناكي”.
وزاد وضح سعد الدريب اللي غيخدم مع المكتب الجديد، وقال: “هادي صفحة وطويناها ما نساوش سعيد الناصيري اللي عطى بزاف للوداد الرياضي ودابا هادي حقبة جديدة برئاسة عبد المجيد البرناكي وكنتمناو التوفيق باش نرضيو الجماهير الودادية الكبيرة”.
وبخصوص طبيعة اللائحة الجديدة اللي نجحت وطلعت لتسيير الوداد جاوب الدريب على سؤال “گود” وقال: “اللائحة الجديدة فيها وداديين قدام وكيعرفوهم الوداديين، واللائحة مازال ما تسدات وكاينين ناس اخرين اللي غيجيو المكتب المديري وهي غير مسألة وقت، ودابا كنخدمو على توزيع المهام البوسط ديال كل واحد وشنو غيدير”.