كود هناء ابو علي كازا ////

بعد اشهر طويلة عين يوم امس الاثنين الملك محمد السادس 5 وزراء. 4 كانو تزلزلو على قبال منارة المتوسط: الصحة والتعليم والسكنى وكتابة الدولة في التكوين المهني ووزير جديد تمت اضافته يتعلق الامر بالوزير المنتدب المكلف بالشؤون الافريقية. هاد التعيين او الترميم خدا وقت طويل. فيه الرابح وفيه الخاسر
1///
تزاد ضعاف رئيس حكومة ضعيف اصلا
الترميم او التعيين زاد ضعف رئيس حكومة ضعيف اصلا. رئيس حكومة كيبان همو الاساسي هو يصبح فالصباح فمنصبو. ما ماديها فيه حد. ما كيتواصلش. ما عندوش الشجاعة يتاخد القرار ولا يخرج يقول المشاكل اللي كتواجهو. مع هاد الترميم زاد ضعاف حقاش كان باغي يتخلص من التقدم والاشتراكية ولكن ضغط قواعدو خلاه يرجع للاور. تمرير تعطل وخدا وقت طويل وفالاخير نكتاشفو اسماء عادية.

2///
البي بي اس الضرب والسكات
اللي خرج رابح من هاد التعيين هو التقدم والاشتراكية. حزب صغير ولكن عندو مناصب مهمة. 2 حقائب مهمة السكنى والصحة وكتابة دولة في الماء. هاد الحزب تمارسات عليه ضغوط كبيرة بزاف باش يطيح باش يخرج كاع من الحكومة ولكن ما قدراتش الاغلبية اللي كيقودها البي جي دي يتخلى عليه.
رجع الحقائب ديالو وراسو مرفوع

3////
الباطرونا غادية وتتمدد
الباطرونا ولات حزب سياسي. من بعد ما خدات فريق برلماني فمجلس المستشارين ولات دابا تتحكم في وزارة =المكلفة بالشؤون الافريقية= هدا فيه اضعاف للعثماني حقاش التعيين ما قربش منو لا داز عليه وفيه تقوية للباطرونا. هاد الوزير للي هو محسن الجزولي ولد الباطرونا معاهم اليوم وكيدير ليهم الدراسات عبر “فاليانس”. الباطرونا غادية وتتمدد

4///
امزازي فبلاصة حصاد او وزارة بدكتورا
حليمة العسالي المرأة القوية في الحركة الشعبية مازالت قوية. السيدة يمكن يكون عندها يد فاستوزار امزازي ولد اخ الرجل القوي في الداخلية سابقا امزازي اللي ولى وزيرا للتعليم.

رئيس جامعة محمد الخامس بالرباط قافز بزاف ولكن ديك الكعية ديال حليمة العسالي غادية تبقى لاصقة فيه. عطاها دكتوراه فخرية ف2015. ثمن الاستوزار