الوالي الزاز -كود- العيون//
استاغل زعيم البوليساريو، إبراهيم غالي، الرئاسيات السنگالية وفوز باسيرو ديوناي بيها باش يجي فبلاصة صديق المغرب ماكي سال.
زعيم البوليساريو وبعدما ربح باسيرو ديوناي الرئاسة على حساب مرشح الائتلاف أمادو با، بغا يتقرب من الرئيس السنگالي الجديد ورسل ليه رسالة فيها التهاني، وبالإضافة للتهاني كانت الرسالة عامرة جس نبض ومزاوگة فنفس الوقت.
هاد جس النبض والمزاوگة كانت واضحة فالرسالة للرئيس السنگالي، بحيث قال فيها زعيم البوليساريو إن الشعب السنگالي و”الشعب الصحراوي” بيناتهم روابط وهادي كانت أكبر كذبة يقولها، علاوة على تضمين رسالتو بإعلانو عن رغبتو فأنهم يتقاربو ويديرو علاقات صداقة وشراكة أكبر.
السنگال واحدة من الدول الأكثر قربا للمملكة المغربية منذ نحو 5 عقود وهادشي كترجمو العلاقات بيناتهم السياسة والروحية، وكينعكس من مواقف السنگال الواضحة من نزاع الصحراء وانخراطها فالدفاع عن الوحدة الترابية للمملكة المغربية فكافة المحافل الدولية، وكذلك افتتاح قنصليتها فالداخلة اعترافا بمغربية الصحراء فأبريل 2021.