سهام البارودي كود //////
راه الضحك و الطنز و حشيان الهضرة موهبة ماشي كلشي كايعرف ليها خاص بنادم يكون كابر فالدروبة و مدوز الخيخ باش يعرف يحشي الهضرة بالفن ! منصف بالخياط بين بأنو راجل خضر، خضر فالثقافة الشعبية هي داك بنادم لي ضحكو خايب و لا لي ماكايعرفش يهضر ، غا جيب يا فم و قول تاشي نهار كايجيب الربحة!
هادشي لي وقع للبلخياط بغا يطنز على نبيلة منيب صدق جايبها فراسو و منوض النحل ! قالك ا سيدي تايعيب عليها حيت “بوكوصة و لابسة مزيان و تاتبان كلاس… كيفاش وحدة تاتبان كلاس و نقيقية غاتكون من اليسار و كاتدافع على الطبقات المسحوقة؟” وا سيدي ان الله جميل يحب الجمال واش هاد الطبقات المسحوقة ماعليهمش الله تاهوما تمثلهم مرا زوينة و انيقة ؟ زعما باش السيدة دافع على الهايش مايش خاصها تلبس دربالة و تبان مشكردة، نشوفو ليها شي جلابة مقطعة و و نصوروها تاضرب الفراكة باش تسما كادافع على الشعب ، الحفا و العرا، الجوع و النوع ! فحالا زعما اليسار مديور غا للمشككين الكدام !
لي ماعارفوش منصف هو الدراري فالفايسبوك راه فرحانين و ناشطين ماقاداهم فرحة ب”طاطا نبيلة منيب”، من نهار شافو ديك التصويرة ديالها و هوما كلشي باغي يصوت عليها، الدراري مساكن طابو بدوك الفيكورات ديال السياسيات المسترجلات، لي مايعكرو مايحكلو، جات طاطا نبيلة و بينات لينا انو حتى السياسيات فيهم الزين و لاكلاس و حتى هوما عيالات زوينات انيقات … شيك ! ايوا شنو ؟ حنا مانستاهلوش زعما سياسيات شيك فحال لبنان و تركيا و فرانسا ، و لا حنا فينما كانت شي مجلودة شاحتة نفرحو بيها و نطبلو ليها، و بنادم لا تنقا و لبس مزيان و سكسف على حالتو نلعبو على داك الوتر ديال الحقد الطبقي باش نهيجو ضدو الهايش مايش !
بالخياط نسا بيلا تاهو راه ماشي شي “شعبية” عندو ! راه الصورة لي عند بنادم عليه هو السيد بيزنيسمان شبعان فلوس ، كايكمي السيغار و كايضرب الكوسطارات نعام ا سيدي … زعما داكشي لي غايعيب بيه على منيب راه فيه و فيه كثر منو ! تاهو ليماج ديالو راها اقرب من ديك ليماج التقليدية ديال مول الشكارة ماشي للبوفري ! ولد دانون ماشي ولد الشعب … السيد كاينطبق عليه المثل القائل اذا كان بيتك من زجاج فماتبقاش تشير على عيباد الله بالياجور!
