محمد سقراط-كود///
كنظن أنه أول مرة في تاريخ المغرب غادي يولي عندنا مغني ديال الراب بنجومية طوطو وبالقاعدة الجماهرية ديالو وبشخصيتو، وعلى خلاف الجيل الأول ديال الروابة لي بقا كينفخ فيهم الدعم ديال الدولة حتى تفركعو جابليهم الله بيهم غادي يحاربوا التطرف زعمة ويجروا الشباب بعيدا عن الأصولية وبقاو كيعلفوهم بفلوس الدعم واخا مكانت عندهم شعبية بحال لي كاينة عند الروابة دابا، وا غير لازون لازون ديال الزعيم راه الصيف كامل فين مامشيتي تسمعها من أحقر الدروبة حتى لأغلى البلايص، الديسك لي كان تفركع شحال هادي بحال هاكا هو كلنا مغاربة ديال آش كاين حتى هو كنتي كتسمعو فين مامشيتي، من غيرو راه تاحاجة ماوصلات لهاد التفركيعة لي ولاو أغاني الروابة طيديروها دابا وبلا دعم بلا لحيس، الدراري مزططين راسهم من النهار اللول بعاد على الدولة وهي بعيدة عليهم، وناضوا نشرو الراب المغربي في العالم حاليا، حقا حاليا كاين تطبيقات كثيرة لي كتساهم في هاد النشر وخصوصا تيك توك ولكن هاد الأخير راه كينشر القديم والجديد الى كان لقديم فيه فايدة غادي تلقاه مفركع فيه.