كود كازا//
الممثل محمد الشوبي كاعي بسباب الدعوى القضائية اللي رفعها محامي ضد مسلسل قهوة “نص نص”، وطالب بتوقيفو غير حيت فيه ممثلة كتجسد دور محامية اعتبرو “كيسيء للمهنة”.
الشوبي رد على هذ المحامي، فتدوينة ليه فالموضوع، وقال أن الفنان عندو الحق ينتقد سلوكات بعض المحامين باسلوب درامي أو كوميدي “حيت الشريفة هي المحاماة وماشي المحامين اللي منهم مرتشين ومخلين باخلاقيات وقسم المهنة”، حسب هضرتو
وزاد الشوبي أن هذشي ماكينطبقش غير على المحامي، بل كاينين بزاف كيتلاعبو بالمهنة ديالهم، بحال الطبيب والجمركي ورجل الأمن والأستاذ وغيرهم، ومايمكنش تنزيه اي ممارسة على هذشي.
وقال ان الدعاوى شبيهة بدعاوى المحامي المصري الملقب ب”المحامي الوحش” اللي كيتربص بجميع الأعمال الفنية ويقدم دعاوى ضدها خدمة لأجندة الإخوان المسلمين، وقال ان المحامي اللي حط هذ الشكاية غادي على هذ المنوال.
https://m.facebook.com/story.php?story_fbid=10158377575798175&id=593293174