كود كازا ///
هاديك الجلسة الشوهة ديال اخر ظهور لوزير الخارجية والتعاون ناصر بوريطة فمجلس النواب غادية تبقى تاريخية. غالبية الفرق البرلمانية جات كتشكر فوزارتو والاف لمغاربة كيعانيو برا. مشاو كل واحد وعلاش٬ حصلو وبلادهم تخلات عليهم.
فضيحة كبيرة تدبيرها بيد بوريطة. جا كيزعت علينا وكيقول باللي غاديين يدخلو شي 8 الاف عالق ومن بعد اللي بغى يجي يشري باكيدج فيه تحليل وطيارة واوطيل. وقال٬ جلسة الأسئلة الشفوية الموجهة للحكومة ان”المغرب ميمكنش يتحمل تكاليف 70 ألف أو 80 ألف عائد”. اييه ما قادرش. علاش كتكذب على لمغاربة.
شوف جيراننا اللي وضعهم الاقتصادي قل منا واللي عدد سكانهم قل منا ولكن كيحتارمو ناسهم. هاد الدولة هي تونس. وزيرها الاول الياس الفخفاخ اليوم قال فالبرلمان حول “حصيلة مائة يوم من حياة الحكومة و خطة الاقلاع بعد كورونا” ان بلادو رجعات 25 الف تونسي حصل برا باش تسدات الحدود بسباب كورونا فيروس
اييه 25 الف. قال حاجة اخرى باش يرد على بوريطة اللي طلب من عالقين فدول بحال البرتغال يمشيو لفرانسا ايلى بغاو يجيو او اللي حصل فنيوزلندا يدخل لاوربا ايلى بغى يجي للمغرب٬ قال الوزير التونسي باللي بلادو رسلات طائرة عسكرية تقودها قبطانة فرحلة فيها 40 ساعة باش تجيب جوج تونسييتين حصلو فبيرمانيا. اييه وهاد الشي على حساب الدولة.
اما هادوك 25 الف فعلى حساب المواطنين. الدولة ما تخلص علي حد ولكن مجبرة تجيب ناسها.
هاداك اللي وقع فهاد الملف كارثة بكل المقاييس. المسؤول عليها وزير الخارجية والتعاون ناصر بوريطة
