اسماء غربي كود كازا ////
كشفت “لوديسك” ان المغرب سمح لاطر فرنسية بالعودة في رحلة من باريس الى المغرب. مصدر رسمي اكد ل”كود” الخبر وقال ان عودة هاد المهندسين والمشرفين ماشي غير ضرورية بل حيوية. المصدر قال ل”كود” باللي بلا هادو غادي يسد مصنع رونو كولو. اليوم لثلاث 26 ماي غاديين يوصلو.
مصدر اخر اكد ل”كود” باللي الربط بين لمغاربة الحاصلين برا وهاد الاطر ماشي منطقي. هادو شركتهم تكلفات بكلشي حتى الفحص ديالهم ومراقبتهم. اللي عطاتو الدولة٬ يضيف مصدر “كود” هو الترخيص تدخل الطيارة للمجال الجوي المغربي وتحط فمطارتنا وان هاد الشي جا بترخيص من وزارة الخارجية والتعاون حقاش بوحدها كتعطي تصاريح بحال هادي.
الخارجية كانت دارت مع الحكومة تدبير كارثي لقضية لمغاربة اللي حاصلين برا. العدد بعدا فيه نقاش شي كيقول 32 الف وشي كيهدر على اكثر من 40 الف حصل باش سد المغرب الحدود بسباب جايحة “كورونا”. يالله دخلو شي وحدين من سبتة ومليلية وماشي كلشي.
لمغاربة فدول كثيرة عاناو وكيعانيو. دارو احتجاجات وغوتو وما داها فيهم حد.
فقضية “رونو” كاين حاجة اخرى خلات المغرب يجيب هاد الاطر. المصانع بداو خدامين ولكن خاص الاطر الفرنسية اللي كانو مشاو بلادهم بعد ما جات “كورونا”. ما غير ديك الهدرة اللي قال مصدر “كود” باللي المصانع هنا غاديين يسدو٬ كاين نقاش فكاع الدول الاوربية باش يرجعو شركاتهم. قبل الجايحة كان هاد النقاش وقالو حتى وزير الصناعة ديال فرانسا برونو بومير. دابا اصوات كثيرة باغة دخل توقف الديلوكاليزاسيون باش تنقد البلاد من ازمة بطالة كبيرة. ففرنسا كيهدرو على مليون فرنسي غادي يتشومر. فيهم بسباب الجايحة وفيهم الشباب الي غادي يوصل لسن الخدمة.
فالمغرب ايلى سدات هاد الشركة استثمار كبير غادي يضيع للبلاد والاف لمغاربة غاديين يبقاو بلا خدمة. باش تكون عندكم صورة٫ فمشروع رونو الجديد للي كان تقدم للملك كيهدر علي استثمار ديال 10 ملايير درهم كاستثمار إجمالي، وخلق 50.000 منصب شغل
لمغاربة كان خاصو يدخلو بغض النظر على شي موضوع اخر. راه ما كاينش شي بلاد فالعالم كتمنع مواطنيها يدخلو لبلادهم. غير المقارنات ما شاداش. حقاش هاد الفرنسيين ما كرهوش يبقاو فبلادهم ويربحو صالير فابور. ما جايينش فرحانين. ولكن ايلى ما جاوش راه الدولة اكثر وحدة غادية ضيع. فالاستثمار فعائدات المغرب من العملة الصعبة فسوق الشغل.
