كود هناء ابو علي ///
من نهار شد ناصر بوريطة وزارة الخارجية والتعاون ومشينا لنهج تصعيدي. هاد الوزير المسكون بصورتو الشخصية دخل فحروب بسباب لغتو الاقرب الى العسكرية وللي ما عندها علاقة بالديبلوماسية.
شي وحدين غاديين يقولو راه الخارجية شأن رئيس الدولة و هو غير كيصرف القرارات بهاد الشي. نردو عليه. راه رئيس الدولة فالحكم هادي 22 عام ودوز بنعيسى والطيب الفاسي الفهري والعثماني وصلاح الدين مزوار قبل ما يوصل لهاد بوريطة. علاش كلهم كان خطاب الخارجية “ديبلوماسي” ومع هادا ولى “حربي”؟
غاديين يقدرو يقولو باللي مغرب البارح ماشي مغرب اليوم٬ ونردو عليهم بخطاب البارح ديال العرش. الملك قال فحديثو علي ضرورة فتح الحدود بين المغرب والجزائر “نتأسف للتوترات الإعلامية والدبلوماسية، التي تعرفها العلاقات بين المغرب والجزائر، والتي تسيء لصورة البلدين، وتترك انطباعا سلبيا، لا سيما في المحافل الدولية”.
هنا اشارة واضحة للديبلوماسية. واش نقد لتصريح السفير عمر هلال الاخير باش جبد لقبايل. هادي مستبعدة. هادي غير نغزة من المغرب وصافي. فيها انتقاد للديبلوماسية الجزائرية وللديبلوماسية المغربية اي لريوسها بجوج.
بوريطة مكلف للمغرب. دابا بدينا مفاوضات مع اسبانيا لعودة العلاقات الطبيبعية بين الدولتين. ممكن غدا تكون المانيا او الجزائر. هاد الشي خاصو يكون مع وزير اخر ماشي مع هادا اللي ممكن يكون فوزارة اخرى الا الديبلوماسية.
