كود علي الصافي كلميم ///

الصورة ديال اطفال فمدرسة خاصة ببويزكارن كيصليو جماعة بزز منهم غير شجرة مخبية فضايح اخرى.هاد الناس بينو نوعية المشروع المجتمعي اللي بغاو. الرجالة القدام ولعيالات اللاور. فرضو عليهم يصليو واخا اطفال. هاد الشي فالتربية مرفوض. عارفين شكون اللي كيشجع هاد الشي. الدواعش وصحابهم فالمشرق.الاكاديمية الجهوية للتربية والتكوين بجهة كلميم واد نون خرجات فتصريح ل”كود” كتقول كلام اخطر. قالت باللي “الكل يعلم أن الصلاة كجميع أركان الإسلام تدرس في التربية الإسلامية” وان “تلقين التلاميذ كيفية أداء الوضوء والصلاة” امر عادي.

وان “الإشكال يكمن في أن الأمر يتعلق بصلاة جماعة مما يطرح إشكالية تقييم كل تلميذ على حدة” وفق ما صرحت به ل”كود”. الخطير حسب هاد الاكاديمية ماشي الصلاة. اللا بل تصوير التلاميذ. وهدر مع هادو على التربية. هادو عندهم مفهوم خاص للتربية والتعليم. مفهوم متطرف. كيفاش كيفرضو على اطفال الصلاة وجاتهم عادية.

دابا حسب تحريات ل”كود” فهاد المؤسسة التعليمية خاصة. شي وحدين من العدالة والتنمية وفق ما توصلت به “كود”٬ دارو تعاونية. اييه تعاونية. سماوها “دار المعارف” وفالورقة اللي عند الوزارة ان القطاع اللي كتخدم فيه هو “القرآنية للتربية والتكوين” وكاينة فزنقة رحال المسكيني بالحي الاداري بويزكارن. هاد التعاونية فيها 5 اعضاء. جوج منهم من العدالة والتنمية وبالضبط من مكتب الحزب فهاد المدينة وهما خالد شربيض وبوزيد بوتغناش بالاضافة الى غرالة بلوش واللي هي اخت ليلى بلوش استاذة التعليم الابتدائي بحالها بحال راجلها سعيد ازكنان وبجوجهم من الاصلاح والتوحيد٬ الدراع الدعوي لحزب العدالة والتنمية.

دابا كيفاش السلطات شايفة هاد الشي وسادة عينيها. ماشي على توظيف الحزب اللي كيقود الحكومة للدين واستغلال بشع للاطفال بل هاد النوع من التكوين للطفل المغربي للطفلة المغربية.