عفراء علوي محمدي- كود//

ماشي جميع الشركات ديال نقل المسافرين والكيران غيخدمو غدا، بزاف منهم رفضو يستأنفو العمل، بسبب الشروط “التعجيزية” اللي فرضاتها عليهم وزارة النقل.

الهيئات المهنية الممثلة لقطاع نقل المسافرين ماعجبوهاش هذ الشروط، وقالت فبلاغ ليها، اليوم الأربعاء، بللي إلى طبقو الشروط ديال دفتر التحملات اللي دارتو وزارة النقل ماغيربحو والو، وماغيعوضوش الخسارة اللي تكبدوها هذي 3 شهور من البطالة خلال الحجر الصحي.

وقالو الهيئات أن صعيب الكيران يعمرو 50 فالمية دالبلايص، ويتاخذو اجراءات وقائية “مبارغ فيها، بلا مايزيدو فالأسعار، وقالو بللي هذشي مغايساعدهومش على العودة للعمل، خصوصا وان الاخلال بهذ الشروط غادي يخليهم يكونو عرضة لعقوبات جزرية.

ودارت وزارة التجهيز والنقل مجموعة من دفاتر التحملات بالنسبة لنقل المسافرين والنقل السياحي، كتتضمن شروط كثيرة، أبرزها يهزو غير النص فالبلايص، ويقيدو سميات وارقام تيليفونات جميع المسافرين، ويحرصو على التعقيم ديال الكيران والمحطات، كيف يفرضو ورقة التنقل الاجبارية على المسافرين اللي غيسافرو بين المنطقة 1 ل2.

دابا واش هاد الكيران عندهم شي عقل. فكاع دول العالم باش خرجو من حالة الطوارئ بتدرج دارو هاد الشي. دابا الطيران نفس الشيء الميترو نفس الشيء الترانات نفس الشيء. 50 بالمائة فقط. حتى لقهاوي والبيران والمطاعم ولبحورا فيها هاد الشي. الا هاد ناس الريع اللي واخدين كريمات فابور كيحلو فمهم.