وكالات //

مأساة عائلية مضوبلة. من بعد يومين من موت مراتو المعلمة بالقرطاس فجريمة إطلاق النار وسط مدرستها الابتدائية (Robb Elementary School) فمدينة يوفالدي التابعة لولاية تكساس الأمريكية، (بعد يومين) مات الراجل بسكتة قلبية.

جريدة “The Independent” البريطانية قالت، أن الراحل جو كَارسيا عندو 48 عام، هو راجل المعلمة إيرما كَارسيا (46 عام)، اللي كانت عزيزة على كلشي ومعروفة بتميزها فخدمتها بالتدريس، واللي ماتت مقتولة فالجريمة المذكورة اللي كان موراها مراهق.

جو كان مصاحب مع مراتو إيرما من أيامات كانو كيقراو، وكان بيناتهم حب كبير ومزوجين هادي شي 24 عام، ونهار ماتت بطريقة مآساوية ما قدرش يصبر وتزير بزاف ومن بعد يومين مات غير بالفقصة والضيم. ودبا خلاو موراهم 4 من وليداتهم يتامى.