كود هناء ابو علي ///

ما تقدرش تصبر على رئيس حكومة بحال ديالنا. من نهار دار الحكومة او داروها ليه وحنا كنقولوها. راه الرجل غير المناسب فالمكان غير المناسب. كون خلاوه فعيادتو كون دارو خير فالبلاد وفالمغاربة.

اخر ابداعاتو اللي كضحك عليه لمغاربة هي تدوينتو على تويتر. كتب “نود التذكير بالعودة للعمل بتوقيت غرينيتش زائد ساعة ابتداء من هذه الليلة عند الساعة الثانية صباحا من يوم الاحد 31 مايو 2020. التدوينة دارها اليوم 24 ماي 2020. يعني عندو اليوم هي 31 ماي. كلشي تخلط عليه. كلشي هارب ليه.

هاد الشي غير حلقة من حلقات كثيرة بين فيها رئيس الحكومة انو اخر من يعلم. فتدبير هاد المرحلة ديال الجايحة كان كيتفرج وما دار والو. ما رأس لا لجنة اليقظة لا كان كياخد القرارات كيف كيفرض عليه منصبو. فانتشار هاد الجايحة كان كيقول ضد اللي خاصو يدار.

نهار قال للمغاربة راه ما كاين والو والبلاد محيمة تسجلات اول حالة. جا للبرلمان كيهدر هدرة وبعدو بنهار كيجيو وزرا حكومتو لا صحة لا تعليم لا مالية كيقولو عكس هدرتو.

داز فالتلفزة وجات كاع القنوات ودار فضيحة. بغى يبين انو كيعرف ملف المغاربة اللي حصلو برا بسباب الجايحة وطلع اخر من يعلم.

اخر زلگاتو هي نهار قال فالبرلمان باللي غاديين نبقاو فديورنا حتى 10 يونيو وبعدو بساعات جا وزير المالية والاقتصاد وقال الخدمة غادية تبدا بعد العيد.

باش وزرا خدامين على تدبير الجايحة كان امين عام العدالة والتنمية ورئيس الحكومة فنفس الوقت كيدير ندوة فالفايس ومع من؟ مع البي بي اس والاستقلال. واش هادا بعقلو؟

هو النهار الاول ما كانش ياخد هاد المنصب. ولكن هادي نهاية متوقعة من واحد خدا منصب ما عرقش عليه. بنكيران حفى الصباط وهو جا لقاها باردة ماشي غير لقاها بادرة بل قولب زعيم حزبو اللي ربحهم الانتخابات. قولبو بتحالف مع ناس الحزب اللي كل واحد خدا نصيبو